Оглом Ципья черкогуртысь клубын ортчем ужрадэ 108 делегатъёс вуизы. Куара сётыны соос быгатӥзы 5 кандидатураос пӧлысь одӥгез понна. Тужгес трос куара люказ Балтаси ёросысь Лариса Михайловна Михайлова.

Ужрадэ Удмуртиысь но делегация ветлӥз: «Удмурт Кенеш» огазеяськонлэн тӧроез Т.В. Ишматова, нациосын ужан политикая министр Л.Н. Буранова, культурая но туризмъя министрлэн воштӥсез П.П. Данилов но мукетъёсыз.

Бигер удмуртъёс сярысь веракуз, Татьяна Ишматова пусйиз, ӵапак Татарстанысь уно удмурт югдытӥсьёс, тодосчиос, гожъяськисьёс, артистъёс потэмын шуыса. Соос пӧлын М.П. Прокопьев, Г.С. Медведев, И.В. Тараканов, В.К. Кельмаков, П.П. Данилов но трос мукетъёсыз. Соос бадӟым пытьы кельтӥзы асьсэ удысъёсазы но оглом удмуртлыкын.

Татчыозь Балтач удмуртъёслэн огазеяськонзылэн кивалтӥсез вал Леонид Сапожников. 25 пала ар тыршыса, со уно ужрадъёс ортчытӥз, туж бадӟым уж лэсьтӥз ёросазы удмурт кылэз утёнъя но азинтонъя, фольклорзэс бичанъя. Балтач палъёсын котьку но пӧртэм концертъёс, фестивальёс, вожвылъяськонъёс радъясько, бадӟым саклык висъяське пӧртэм праздникъёсыз, кылсярысь, Гырон быдтонэз пусъёнлы. Нялтас вераса, вуоно арын Татарстанысь удмуртъёслэн Гырон быдтонзы нош ик ортчоз Балтасиын, но асьсэос «кенешчиос» верамъя, историысьтызы со тужгес золэз луыны кулэ: отчы вуылозы Футболъя чемпионатэ лыктэм куноос но.

Леонид Дмитриевич йылпумъян-быръён ужрадысен ужамез сярысь пыр-поч доклад лыдӟиз, юрттӥсьёсызлы тау кариз, нош выль кивалтӥсьлы азинсконъёс сӥзиз.

Нялтас вераса, туннэ нуналлы Татарстанысь Балтаси ёросын 4 сюрслэсь уногес удмуртъёс лыдъясько - со ёросын вань улӥсьёслэсь ог 12 процентэз. Чылк-чылк удмурт гуртъёссы 18. Тужгес бадӟымез соос пӧлысь - Сырья, отын 60 хозяйствоос но 266 улӥсез.

Туспуктӥз Наталья Жукова