Ужрадлэн валтӥсь ужпумез - удмурт егитъёсты кылмес, культурамес утён но азинтон уже кыскон, сое калык пӧлы вӧлмытон. Со понна форуме лыктэмъёс ужазы 4 ӧръёсъя: творчество, мугорез кыдатон, этноблогинг но дизайн. Форумлэн нырысетӥ 3 нуналъёсыз ӵоже ваньзы быгатонлыкъёссэс волятӥзы, нош берпуметӥ нуналаз пыриськизы Татарстанысь удмуртъёслэн Гырон быдтон праздниказы: творческой ӧр пуктӥз концерт номеръёс, мугорез кыдатонъя секция пыриськиз спортъя ӵошатсконъёсы, этноблогингысь егитъёс гожъязы шулдыръяськон сярысь мер вотэсъёсын, нош дизайнеръёс дасязы туспуксён инты - пуллэсь «БиГерд» кылэз. Со сяна, форуме вань пыриськемъёс ортчытӥзы яркыт флешмоб, соос борды итӥськизы Балтаси ёросысь кырӟась-эктӥсь коллективъёс но.

Радъясьёс пусъё, та форумлэн валтӥсь малпанэз - егитъёс егитъёс понна. Мукет сямен вераса, асьсэос егитъёс дышето эшъёссэс кыӵе ке ужлы. Кылсярысь, Казаньын дышетскись Анна Самсонова 2-тӥ арзэ ини форумын флешмоб пуктӥз.

- Мон весь тазьы верасько: кин тае, мон сяна, лэсьтоз? Мынам удмурт лулчеберетэз ӝутэме потэ, Татарстанын со понна луонлыкъёс вань, - вера Анна. – Удмурт сямен кырӟаны но эктыны форумын гинэ ум дышетӥське, таӵе уж нуиське Казаньын но.

- Та форумез кылдытон сярысь малпан 2009-тӥ арын кылдӥз вал ини, но кисьмаз ай кылем арын гинэ, - вераз Татарстанысь удмуртъёслэн национально-культурной автономизылэн быдэсъясь директорез, «БиГерд» форумез радъясь Марина Иванова. - Кылем арын со люказ 37 адямиез, туэ - 70-зэ ини. Та лыдпусъя гинэ вераны быгатӥськом, проектмы удмурт егитъёслы тунсыко шуыса. 

- Тӥ кузь но тунсыко сюрестылэн кутсконаз гинэ ай, - шуиз Татарстанысь Президентлэн национальной политикая Департаментысьтыз кивалтӥсьлэн воштӥсез Евгений Ефимов. - Тӥляд туж ӟеч луонлыкты люкаськылыны, мар ке выльзэ малпаны.

Со озьы ик пусйиз, Татарстанысь калыкъёс пӧлын удмуртъёс асьсэды туж усто возьмато, тыршыса ужало шуыса, нош «БиГерд» форум трос мукет форумъёс пӧлысь висъяське аслаз семьяын кадь ӟеч кусыпъёсыныз.

Зэм но, нырысетӥ нуналысеныз ик форуме лыктэмъёс капчиен ог-огенызы но, радъясьёсын но, куно пумитасьёсын но огкыл шедьтӥзы. Кузёос та ужрадэз ортчытон понна Покчи Лӧзя школае 70 койкаос, изён арбериос вайиллям. Дышетӥсьёс поттылӥзы, та уж борды быдэс школа, быдэс гурт итӥськиз шуыса - кин ке дорысьтыз койка ваем, кин ке - миндэр.

Пумитазы но туж-туж зол. Нош кыӵе сюдӥзы! Котькудӥзлэсь пыриськисьлэсь юа, мар тужгес зол тодаз кылиз, огымысь шуозы: сиёнзы! Зэм но, пӧрасьёс ӵукнаысен ӝытозь егитъёслэн кузязы ветлӥзы, туж ческыт но тросэн сюдӥзы.

- Егитъёс туж мылкыдме ӝутизы, - вера школаысь завхозлэсь ужзэ быдэсъясь Наталия Артемьева. -  Сюлмысь эктыны-кырӟаны дышетскизы. Макем шумпотымон со! Татын егитъёс шоры учкыса сылӥ, нош ужысь бертыку, ас поннам кырӟаса бертылӥ. Табере соослэсь мӧзмо ини, соостэк школамы копак буш кылиз.

«БиГерд» форум 2-тӥзэ радъяськиз, но берпуметӥзэ ӧз, оско радъясьёс. Вуоно арын та проектсэс улонэ пыӵатыны малпало Мамадыш ёросын, ӵапак отын ортчоз вуоноез Гырон быдтон но.