Азьвыл та смена 4 нунал ке кыстӥськиз, туэ 1 нуналлы кузьгес луиз - нылпиос понна со шумпотон ини. Таяз радэ но дышетскисьёс, Можга ёросысь но карысь сяна, вуизы Алнаш, Грак но Кизнер ёросъёсысь. Оглом соос 40 кузя.

Лагере лыктэмъёслэн ваньмон дырзы чик ӧвӧл, шуыны луэ, уго радъясьёс сюлмасько соослэсь котькуд нуналзэс тунсыко ужрадъёсын но занятиосын тырмытыны. Таяз аре сменаын дышетскон мынэ 7 ӧръёсъя, соос пӧлын фольклор, эстрада, эктон, видеоискусство, дизайн но мукетыз.

Лагерез радъясь Надежда Сапожникова верамъя, «Тулкыме» нылпиосыз котькуд ёросъёс асьсэос быръё но келяло, со понна соослы сётӥсько квотаос. Вань нырысьсэ лыктӥсьёс но, азьвыл ветлэмъёсыз но.

- Сменамы пыр ортчемъёс азьланяз тросэз пыро Можга педколледже но мыло-кыдо пырисько «Шунды» огазеяськонлэн ужаз, - шуэ Н. Сапожникова.

Лагерьлэн темаез котькуд ар вошъяське. Туэ со сӥземын волонтёръёслы, уго 2018-тӥ ар кунамы волонтёрстволэн ареныз лыдъяське, озьы ик литературалы.

- Лагерь ӵоже ми валэктом пиналъёслы, кин со сыӵе волонтёр, кыӵе волонтёр огазеяськонъёс вань ёросамы но оглом элькунамы, кызьы отчы пыриськыны но мар со сётэ, - азьланьтэ Надежда Сапожникова. - Со сяна, ми вераськомы литература сярысь но. Элькунысьтымы Национальной библиотека та арез Можга литературалэн арезлы сӥзиз, со улсын пӧртэм ужрадъёс радъясько. Милям сменаямы но вуозы Можга карысь но ёросысь библиотекаосысь ужасьёс, тунсыко пумиськонъёс ортчытозы.

Лагерез радъяны котьку ар юрттэ элькунысьтымы Нациосын ужан политикая министерство но спонсоръёс.