Туэ та форум Татарстанысь удмуртъёслэн национально-культурной автономизылэн кичӧлтэмезъя 2-тӥзэ радъяськоз ини. Но кылем арын со 40 пала бигер удмуртъёсты огазеяз ке, туэ паськытгес луоз: радъясьёс ӧтё форуме Татарстанысь, Удмуртиысь, Башкириысь, Марий Элысь, Пермь, Киров но мукет улосъёсысь 100 пала 16 аресысен 30 аресозь удмурт кылын вераськись удмурт егитъёсты. Эшшо одӥгез куронзы - пыриськисьёслэн одно ик удмурт дӥськутсы луыны кулэ.

«БиГерд» Гырон быдтон праздник сьӧры ветлэ, шуыны луэ: кылем арын со ортчиз Менделеевск ёросысь Тэремшурын, туэ радъяськоз Балтасиын. 28-тӥ-30-тӥ инвожое вань люкаськемъёс ужалозы 4 секциосъя: творческой, этноблогинг, дизайн но мугорез кыдатон, нош 4-тӥ нуналаз - 1-тӥ пӧсьтолэзе - пыриськозы Татарстанысь удмуртъёслэн Гырон быдтон праздниказы, юрттозы радъяны площадкаосты, гожъялозы иворъёс шулдыръяськон сярысь. Со сяна, ортчытозы бадӟым флешмоб.

«БиГерд» форуме шедён понна егитъёслы одно ик 20-тӥ инвожоозь сётоно куриськон, солэсь формазэ шедьтыны луэ «ВКонтакте»-ысь «МОЛОДЕЖНОЕ КРЫЛО НКА УДМУРТОВ ТАТАРСТАНА» группаысь. Отын ик форумъя вань иворъёс луозы: кытын форуме пыриськисьёс улозы, маин вырозы, кин соосыз дышетоз, мар сьӧразы форуме нуоно но мукетыз.