Дасьсэ возьмано ӧвӧл, аслыд вырӟоно
04.06.18
Кылем арын «Удмурт Кенеш» огазеяськон ялӥз вал кадръёсын резерваз шедён понна вожвылъяськон. Нош алигес люкалляз со конкурс пыр потэмъёсыз нимысьтыз кенешонэ. Пумиськонэз радъязы но асьсэ мылкыдъёссэс веразы «Удмурт Кенешлэн» тӧроез Татьяна Ишматова но кадръёсын резерв сярысь программаез кылдытӥсь Александр Скобкарёв.
- Азинскыны планэд медло
Та вожвылъяськонэз ялыкузы, «кенешчиос» азязы кӧня ке бадӟым ужпумъёс пуктӥзы: удмурт специалистъёсыз утчано но соосты син азьын возёно, быгатэмъя соослы юрттоно, та уже городъёсыз гинэ ӧвӧл, гуртъёсыз-ёросъёсыз но кысконо.
- «Удмурт Кенешлэн» кадръёсын резерваз шедьыны 80-лэсь уно куриськонъёс вуизы, - вера программалэн кичӧлтӥсез Александр Скобкарёв. - Соос пӧлысь 68-сэ кутӥмы. Жаляса верано, ужмы борды вань ёросъёс ӧз итӥське, ваньмаз гожтэтъёс келям ке но. Тужгес трос мылкыд карисьёс вал Ижысь, Кияса, Дэбес, Якшур-Бӧдья ёросъёсысь.
Александр Николаевич ивортӥз, вань вуэм куриськонъёс 4 ӧръя люкылэмын вал шуыса:
1) кивалтон удыс;
2) политической партиос, некоммерческой огазеяськонъёс, искусство, культура но туризм;
3) дышетон, наука, калыклы социальной юрттэт сётон;
4) печать, ивор вӧлмытон, спорт, егитъёсын ужан.
Резерве шедьыны мылкыд карисьёс тросэз - 30 мурт - кивалтон удысын тыршо, 24-ез - дышетон, наука, социальной удысъёсын, 14-ез - ивор вӧлмытонын, спортын но егитъёсын ужанын, нош 13-ез - партиосын, некоммерческой огазеяськонъёсын, культура но туризм удысъёсын.
- Конкурсэ 24 филологъёс, крезьгуръя 9 дышетӥсьёс, гурт удысын 8 тыршисьёс, озьы ик эмъясьёс, историкъёс, экономистъёс, юристъёс пыриськизы. Пӧлазы наукаосъя 2 докторъёс, 5 кандидатъёс, 6 студентъёс, ссузъёсысь 2 егитъёс но 2 школьникъёс, - вера Александр Скобкарёв. - Но алама, одӥг но инженер, лэсьтӥськись, вуз карон удысын ужась дорамы ӧз лыкты шуыса, уго резервамы специалистъёс пӧртэмесь луыны кулэ, тужгес ик - экономикаез азинтӥсь удысъёсысь.
Кадръёсын резерве пыртэм муртъёс эшшо 2-лы люкемын на: оперативной но перспективной резервъёсы шедемъёс. Нырысетӥосыз дась ини туннэ ик тыршыны, оскем ужез быдэстыны. Кыкетӥосызлы со понна кыӵе ке вамыш лэсьтоно на: тырмыт ӧвӧл дышетскемзы, опытсы яке мукет мугъёс люкето.
Тросэзлы, жаляса верано, уг тырмы дӥсьтон, кин ке ӧтемез возьмаса пуке. Но дыр туж ӝог воштӥське, соин ӵош специалистъёс азе пуктӥськись куронъёс но выльдӥсько. А. Скобкарёв верамъя, туннэ дышетсконо астэ калык, уж сётӥсьёс азьын усто возьматыны, вольыт вераськыны, дӥсьтӥсь луыны.
Та вожвылъяськонэ пыриськемъёс куриськонъёссэс пӧртэм мугъёсын гожтӥзы, луоз. Кин ке, оло, резерве пырыны тыршиз, «кенешчиос» бӧрысь солы ӟеч инты дасялозы но ӵектозы шуыса. Но туннэ нуналын дасьсэ ӵектӥсьёс, жаляса верано, нокытын ӧвӧл. Та программа юрттыны кулэ адямилы ачиз сярысь малпаськыны но быгатонлыкъёсыз шоры палэнысен учкыны, азинскон понна аслыз тупамон план кылдытыны. Мар веранэз - ваньмы асьмеос пӧртэмесь, котькудмылэн сюресмы аспӧртэм. Нош «Удмурт Кенеш» быгатэмезъя юрттыны тыршоз: визь-кенешен, ӟеч рекомендациен. Но резерве сюрем мурт таиз сярысь но малпаськыны кулэ: ушъясь гожтэт сёто ке, иське, тыныд оско. Со, огласянь, бадӟым юрттэт, мукет ласянь, бадӟым кыл кутон: зол тыршоно, юрттӥседлэсь нимзэ медад сапта.
Резервын юнме ӧвӧл
Кадръёсын резерве сюрон понна конкурс бере 1 ар ортчиз. Татьяна Ишматова верамъя, та ар куспын резерве куд-огезлэн шедемъёслэн улонзы зол воштӥськиз. Кылсярысь, Можгалась Эдуард Петров 2-тӥзэ Кун Кенеше депутатэ быръемын, Удмурт кун университетысь Мувӧйя институтысь студент Степан Черепанов сюриз Кун Кенеш бордысь Егитъёслэн парламентазы, лушкем быръёнъёс дыръя солы оскемын вал Лыдъясь комиссиен кивалтыны. Егитъёслэн парламентазы Культурая, туризмъя но йӧскалык политикая комитетэн кивалтыны оскемын озьы ик кадръёсын резерве шедем муртлы - Удмурт кун университетысь Удмурт филологияя, финно-угроведениея но журналистикая институтысь егит дышетӥсьлы Александр Корепановлы, нош Гурт удысъя комитетлэсь ужзэ валтоз Вавож ёросысь Елена Чернова. Пусйыны кулэ, солэн проектэз кылем арын «Удмурт-а мон?!» форумын но вормисьёс пӧлы шедиз вал. Дышетӥсь, «Билингва» проектэз валтӥсь Татьяна Волкова луиз К. Герд нимо йӧскалык гимназилэн директорез. «Шунды» огазеяськонлэн азьвыл тӧроез Ольга Степанова (Тронина) вуылӥз стажировкае Финляндие, нош али кивалтоз шаерысьтымы Эшъяськон юртысь калык кусыпъёсъя ёзэтэн. Ижысь медициная кун академиысь студент Григорий Иванов «Шунды» огазеяськонлэсь академиысь ёззэ кылдытӥз, соин кивалтэ, дасяське мыныны кунгож сьӧры стажировкае. Азинске, туж мыло-кыдо ужа, котькытчы вуттӥське Можга ёросысь Денис Антонов. Озьы ик туж адӟем карымон луэ Ижысь 6 номеро больницаысь валтӥсь врачлэн воштӥсез Надежда Гузнищева. Пусйытэк ӧз кельтэ Удмурт театрысь артистэз Максим Князевез но. Максим кылем арын вазиськиз кадръёсын резервез радъясьёслы, Москваысь Искусствоведениея институтэ пырыны юрттэт курыса. Жаляса верано, министерствоосы вазиськылыса но, кивалтӥсьёсын кенешыса но, Максимлы соку юрттыны ӧз луы. Но пияш мукет амал шедьтэм но туэ сӥзьыл дышетсконзэ мытыны чакла ни. Озьы ик тунсыко луэ Якшур-Бӧдья ёросысь крезь лэсьтӥсь Василий Широбоков. Туэ Эстониын бадӟым фин-угор конференция радъяськоз, котькуд фин-угор кунлэсь но улослэсь отчы делегация мыноз. Удмуртилэн делегацияз Василиез пыртыны малпамын: отын со быгатысал кантеле инструментэн вырисьёсын тодматскыны (кантеле крезьлы матын), соосын кусып юнматыны, дышетскыны. - Та азинсконъёсты возьмато, тӥ асьтэ бордын ужаны быгатӥськоды но резервамы юнме шорысь ӧд шеде шуыса, - вераз Александр Скобкарёв. - Но кулэ на вылэм азинсконъёсты сярысь иворез золгес вӧлмытыны. Со сярысь удмурт кылын гинэ ӧвӧл, ӟуч кылын но мед ивортысалзы. Вералом Алексей Арзамазовез ик. Нижний Новгородысь адями лыктӥз Удмуртие, дышетӥз удмурт но мукет кылъёсты но табере удмурт гимназиысь пиналъёсыз китай кыллы дышетэ, дуннеез котыръя. Паймымон но адӟем карымон ӧвӧл шат? - Али ялэмын конкурс Удмуртилэн командаяз сюрон понна. Мыным потэ, асьмелы отын но кужыммес эскероно, - йылтӥз Татьяна Ишматова. - Валамон, ваньзэс отчы уз басьтэ, но аслэсьтыд быгатонлыкъёстэ мертан урод ӧвӧл ук.
- Огазе люкаськылоно
-
Пумиськон пумын уноез пусйизы: азьланяз но тазьы люкаськылоно, пӧртэм тренингъёс, дышетсконъёс радъялляно.
- Мед луысалзы ачид сярысь ивортонлы, шонер резюме яке ужедъя газетэ статья гожтонлы, Интернетын постъёс кылдытонлы сӥзем дышетсконъёс, - ӵектӥз Надежда Гузнищева.
- Умой луысал, сыӵе пумиськонъёсты асьме пӧлысь ик специалистъёс ортчытъясалзы ке, - шараяз малпанзэ Татьяна Ишматова. - Огласянь, адями аслэсьтыз кужымзэ, дышетыны быгатэмзэ эскерысал, мукет ласянь, со специалист сямен усьтӥськысал.
- Нош мыным потэ, умой луысал сыӵе дышетсконъёсыз 1-2 нуналъем карыны но отчы палэнысь но дышетӥсьёсты ӧтчаны, - шуиз «Удмурт дунне» газетлэн валтӥсь редакторезлэн воштӥсез Елена Миннигараева. - Палэнысен асьме шоры учкон мукет, со юрттысал тырмымтэосмес адӟыны, вылезлы дышетскыны.
Ӵектэмын на вал Ижын но элькунмылэн пӧртэм сэрегъёсаз ортчылӥсь пӧртэм дышетсконъёс, семинаръёс, тренингъёс сярысь иворез резерве шедемъёс пӧлын вӧлмытыны, отчы но пыриськисьёс мед луозы шуыса, Интернетын нимысьтыз группа кылдытыны, со пыр ог-огеныд кусып возьыны. Со сяна, басьтэм азинсконъёс но кылдылӥсь шуг-секытъёс сярысь, араз кӧня ке пол тазьы огазьын пумиськыса, кенешыны.