[HTML]
Нырысь ик соос азьын вераськиз «Мынам Удмуртие» телерадиокомпанилэн директорез Марина Городилова. Со ивортиз удмурт передачаослэн азьланез сярысь. Сизьылысен ни, пе, учкисьёсты шумпоттозы «Удмурт шаер», «Берен гуртэ», «Вау-шоу», «Шудком», «Эскером», выльдэм «Свети дорын куноын» но «Огыр-бугыр» теле- но радиопередачаос. Соос бордын уж рос-прос нуиське ини. Озьы ик М.Городилова мадиз зуч кылын но выль проектъёссы сярысь. Туннэ нуналлы «Мынам Удмуртиез» телевизор пыр учкыны но радио пыр кылзыны гинэ овол, вотэс пыр но учкыны-кылзыны луэ. Дырен чош вамышъяськом, шуэ кивалтись.
Борысь вераськон выжиз элькунысьтымы удмурт кылъя но литературая дышетисьёс понна форумез радъян борды. Та ужрадлэн кичолтисез луизы «Удмурт Кенеш» огазеяськон Кун Кенешысь Дышетонъя, наукая, йоскалык, егитъёсын ужан политикая но спортъя ялан ужась комиссиен чош. Форумез чакламын ортчытыны Можга ёросысь Уча гуртын 21-ти гудырикошконэ – чапак отын 100 ар талэсь азьло пумиськиллям но тодматскиллям Кузебай Герд но Ашальчи Оки.
– Мугез сыче тунсыко бере, оргкомитетын кенешимы, доклад лыдзисьёсмы асьсэлэсь веранзэс кутскозы яке йылпумъялозы А. Окилэн яке К. Гердлэн кылъёсынызы, – ивортиз «Удмурт Кенешлэн» тороез, Кун Кенешысь депутат Татьяна Ишматова. – Сцена вылын вераськозы шаерысьтымы адзем карымон, туала методикаосты ужазы быгатыса кутись дышетисьёс. Форумез йылпумъялоз пичияк концерт.
Борысь исполкомчиос кылзизы Удмурт егитъёслэн «Шунды» огазеяськонзылэсь торозэ Алина Черноваез. Со мадиз гужем чоже удмурт нылпиос но егитъёс понна радъяськись проектъёссы сярысь: «Шудкар», «Жужась кизилиос», «Тулкым», «Эру», «Усточикар» но жоген ини осъёссэ усьтоз тужгес тодмоез но яратымонэз лагерьзы «Шундыкар».
Со сяна, исполкомын жутиськизы на мукет тунсыко юанъёс. Кылсярысь, «кенешчиос» чаклало потыны вазиськонэн, Элькунысьтымы Мер палатае но Данъян пул вылэ кандидатураос чектыса. Нимысьтыз вераськон мыниз туэ сизьыл Эстониын конгрессъёс вискын ортчоно конференция пумысен, отчы делегатъёсты бырйизы.
;nbsp,