[HTML]
Ужрадэ Удмуртиысь делегация но вуылӥз: Михаил Михайлов – «Шулдыр ӝыт» ансамбльлэн директорез, Любовь Михайлова – К. Герд нимо йӧскалык нылпи садын ужась, Ксения Широбокова – Элькунысьтымы Эшъяськон юртысь методист, чеберлыкъя конкурсъёсын вормись но Елена Рябина – «Удмурт Кенешын» но «Удмурт дуннеын» ужась. Ваньзэс ик соосты жюрие пуктӥзы – палэнысен дунъясьёслы оскон бадӟымгес, пе.
Вожвылъяськонзы элькун ке но нимаськиз, отчы пыриськизы Башкирилэн Янаул, Таташлы но Калтасы ёросъёсысьтыз, озьы ик Пермь улосысь Куеда ёросысь 10 чеберайёс. Соос ваньзы ик тодыны кулэ вал анай кылзэс, сям-йылолъёссэс.
– Та вожвылъяськон адӟытэ, кызьы нылъёс быгато ас кылзэс яратыны но ог-огенызы эшъяськыны. Башкириын со брендовой луиз ини но ортчылэ 2 арлы одӥг пол, – шуиз Башкириысь Удмуртъёслэн историко-культурной центрысьтызы валтӥсь специалист Ирина Самигулова. – Милесьтым адӟем карыса, туэ нырысьсэ таӵе вожвылъяськон ортчиз Пермь улосысь Бадӟым Гондыр гуртын. Ми отчы вуылӥмы, нош табере соос ми доры лыктӥзы. Анай кылынымы вераськыны но сое азинтыны туж кулэ, та ужрадмы со понна одӥгез амал луэ.
Вожвылъяськонын нылашъёс возьматӥзы сцена вылын ;nbsp,асьсэды возьыны быгатэмзэс, вашкала удмурт дӥсез но сям-йылолъёсты тодэмзэс, пӧраны, мунёос вурыны, кырӟаны-вераны быгатэмзэс. Ваньзы ик зол дасяськиллям, котькуд номерлы тунсыко образъёс кылдытӥллям.
– Вожвылъяськонмы эшшо но золгес, айбатгес луэмын, – шумпотэмзэ вераз Янаул ёросысь «Удмурт Кенешлэн» ёзэныз кивалтӥсь Юрис Саитов.
Солэсь кылъёссэ юнматыса, Башкириысь удмуртъёслэн национально-культурной центренызы кивалтӥсь Салимьян Гарифуллин шуиз на:
– Конкурсэ пыриськисьёс ваньзы туж кужмоесь. 1-тӥ интыез но гран-приез 1 балл гинэ люкиз!
Зэм но, тужгес трос балл люкаса, гран-приез басьтӥз Вуж Варяшысь Диана Насибуллина. Солэсь 1 баллы кыльыса, 1-тӥ интые потӥз Татышлы ёросысь Ника Муллаярова. 2-тӥ интыын – Янаул ёросысь Есения Хуснимарданова, нош 3-тӥын – Татышлы ёросысь Линда Гильманова. Мукетъёсыз нылъёс пӧртэм номинациосын вормисе потӥзы. Ваньзы ик соос дуно кузьымъёсын, «Чеберина» лентаосын пусъемын вал.;nbsp,