[HTML]

Пумиськон сӥземын вал Россиысь удмуртъёслэн нырысетӥ ӧтчамзы дырысен 100 ар тырмонлы. Соин ужрад та темая доклад бордысен кутскиз. Дасяз сое Удмурт кун университетысь дышетӥсь, филология тодосъя кандидат Александр Шкляев. Со ивортӥз Россиысь удмуртъёслэн Елабугаын 1918-тӥ арын ортчем ӧтчамзы но со дырысен туннэ нуналозь удмурт движенилэн азинскемез сярысь (докладзэ лыдӟыны луоз «Герд» газетысь). Александр Григорьевич пусйиз, ӧтчам удмурт калыклэн улоназ туж бадӟым инты басьтӥз шуыса, уго ӵапак со луиз инъет, сётӥз кутскон кунлыкмылы.

Котькуд Пичи кенешын ужамзы сярысь иворто ёрос ёзъёс. Таяз радэ вераськизы палэнысь лыктэм азьветлӥсьёс: Башкириысь Ирина Самигулова но Пермь улосысь Станислав Гадиятов.

Башкир удмуртъёслэн тыршемзы шоры котьку синмаськыса учконо: соос, палэнын ке но уло, быгато утьыны кылзэс но культуразэс, уно ужрадъёс ортчыто, Удмуртие вожвылъяськонъёсы вуыло, вормонъёсын берто. Маиз тужгес синмаськытэ – Башкириысь школаосысь анай кылмы уг кошкы. Татышлы ёросысь Улын Балтач гуртысь гимназилэн директорез Людвиг Зидымаков ивортэмъя, элькуназы удмурт пиналъёслэн школаын арнялы быдэ анай кылъя 3 уроксы луэ. ;nbsp,

Удмурт кылмес но культурамес утёнын но азинтонын бадӟым уж нуэ Выль Татышлыысь Удмуртъёслэн историко-культурной центрзы но. Со котькуд ар пӧртэм акциос, конкурсъёс радъя, башкир удмуртъёс асьсэды туж йӧно возьмато Башкириысь унояз ужрадъёсын. Озьы ик ӟеч кусып возё мукет улосъёсысь удмуртъёсын но. Кылсярысь, огъя ужрадъёс ортчытъяло Пермь улосысь удмуртъёсын. ;nbsp,;nbsp,

Пермь удмуртъёслэн, жаляса верано, югдурзы уродгес.

– Туннэ нуналлы Пермь шаерын 20 сюрслэсь уногес удмуртъёс уло. Но та лыдпус арысь аре кулэсме, – ивортӥз Пермь улосысь «Удмурт Кенешлэн» кивалтӥсез Станислав Гадиятов. – Жаляса верано, анай кылмылы дышетон мынэ ляб. Удмурт кыл предмет чотын дышетӥське Куеда ёросысь Кирга школаын гинэ, куд-ог школаосын дышетыны луэ факультатив амалэн.

Озьыен, Пермь улосын кылмы улоз шуыса, вань оскон семья вылэ гинэ усе на. Озьы ик, Станислав Идиятович верамъя, шаеразы ужало уно удмурт коллективъёс, кудъёсыз тыршо калык пӧлын вӧлмытыны кырӟан-веранъёсмес.

Бӧрысь «кенешчиос» азьын вераськиз исполкомлэн ёзчиез Сергей Касаткин. Со ивортӥз Россиысь Фин-угор калыкъёслэн ассоциацизылэн президиумезлэн Йошкар-Олаын ортчем кенешез сярысь.

– Поръёслэсь трос удысъёсын адӟем кароно, – шуиз Сергей Анатольевич. -Кылсярысь, ми трос вераськиськом ини Ижын Удмурт культурая центр усьтон сярысь, рос-прос ужамы солэн концепциез бордын. Нош центрлэсь оглюкетсэ син шоры пуктыны луиз, Йошкар-Олаысь йӧскалык кафеязы ветлыса. Отын ӝытбыт чузъясько пор гуръёс, менюзы пор но ӟуч кылъёсын лэсьтэмын, отын трос пор сиён-юонъёсыз, официантъёссы пор дӥськутэн ветло. Маиз эшшо синйылтымон – кафее Йошкар-Олаын улӥсьёс гинэ уг ветло, быдэс элькунысь поръёс лыкто. Со зэмзэ но огазеясь, туж ӟеч люкаськон но шутэтскон инты.

Озьы ик С. Касаткин ивортӥз Вань поръёслэн 2-тӥ ӧтчамзы дырысен 100 ар тырмонлы сӥзем конференцие пыриськемзы сярысь, пор кылэз дышетонъя югдурен. Нялтас вераса, кыкетӥез юан вань фин-угор калыкъёсты сюлмаськытэ. Пичи кенешын но удмурт кылэз дышетон пумысен юан ӝутӥськиз: анай кылмыя учебникъёс федерал перечене пыртэмын ӧвӧл, озьыен, соосъя дышетскыны уг яра. Нош экспертиза ортчыто Москваын гинэ. Тросэз меда экспертъёссы удмурт кылэз тодо? Кыӵе дунъет соос сётыны быгатозы? Вань малпанъёсты лыдэ басьтыса, «кенешчиос» огкылэ вуизы: Пичи кенешлэн нимыныз вазиськон гожтоно, пичи кылъёсъя учебникъёслы экспертиза улосъёсын лэсьтыны курыса.;nbsp,

Ужрадлэн кыкетӥ люкетаз кенешчиос ӟечкылазы Владимир Емельянович Владыкинэз. Профессорлы, история тодосъя докторлы, Удмурт Элькунлэн дано кунмуртэзлы, Кузебай Герд нимо йӧскалык премилэн лауреатэзлы тырмиз 75 арес.