[HTML]Тодады вайытом: туэ дунъясь комиссилы 5 кандидатураос пӧлысь устооссэ быръёно луиз. Семён Виноградов, Валериан Никитин, Вениамин Ившин, Надежда Пахомова, Вавожысь крезьчиослэн «Ошмесо шаер» дуэтсы – ваньзы ик бадӟым уж нуо удмуртлыкез, удмурт культураез азинтон удысын.;nbsp,
Споръяськемзы бере огкылэ вуизы: 2017-тӥ ар понна Кузебай Герд нимо премиез сётоно Кияса ёросысь Надежда Пахомовалы но «Удмуртия» издательстволэн азьвыл редакторезлы Вениамин Ившинлы.;nbsp,
Надежда Викторовна Пахомова культура удысын 22 ар тыршемын. 2001-тӥ арысен кутскыса, Надежда Викторовна быгатыса кивалтэ «Инвожо» фольклор ансамблен. Отын 3 поколение кырӟа. Ансамбль калык пӧлысь кырӟанъёсты, эктонъёсты но шудонъёсты бича. Озьы коллективлэн репертуарез ялан узырме. «Инвожо» уно вожвылъяськонъёслэн но фестивальёслэн лауреатсы луэ. Солэн кивалтӥсез но – Надежда Викторовна – ӟеч тыршемез, удмурт культураез утемез но азинтэмез понна трос пумо грамотаосын, дипломъёсын пусъемын, озьы ик со Удмурт Элькунысь культура удысысь дано ужась луэ.;nbsp,
Н. Пахомова 20 арлэсь кема кивалтӥз «Удмурт Кенешлэн» Кияса ёросысь ёзэныз. 1989-тӥ арын солэн кичӧлтэмезъя ёросын нырысетӥез удмурт коллектив кылдӥз – «Ашальчи».;nbsp,
Надежда Викторовна кичӧлтэмъя ик Кияса ёросысь Уддяди гуртын Удмурт корка усьтӥськиз. Али со трос туристъёсты бордаз кыске.;nbsp,
Н. Пахомовалэн нимыз 2003-тӥ арын «Удмурт Кенешлэн» Данъян книгаяз пыртэмын.;nbsp,
Вениамин Никонорович Ившин – тодмо удмурт кылбурчи, публицист, журналист, редактор, берыктӥсь.;nbsp,
Ужан сюрессэ Вениамин Никонорович кутскиз «Дась лу!» газетын. Нырысь литературной ужась, бӧрысь валтӥсь редактор вал. Отысь выжиз «Советской Удмуртия» газетлэн редакцияз. Нош 1986-тӥ арын В. Ившинлы оскизы удмурт нылпиослы «Кизили» журнал кылдытыны, со ик нырысетӥ редакторез луиз. Собере валтӥсь редактор луыса тыршиз «Кенеш» журналын. Нош 1994-тӥ арысен 18 ар ӵоже валтӥсь редактор вал «Удмуртия» издательствоын.;nbsp,
Вениамин Ившин – уно книгаослэн, статьяослэн авторзы. Со сяна, 2011-тӥ арын «Удмурт Кенеш» огазеяськон куремъя, Трокай Борисовлэн 120 аресъем юбилеезлы сӥзьыса, Вениамин Никонорович пӧртэм книга-журналъёсысь, документъёсысь иворез люкаса, «Т. К. Борисов: штрихи к биографии» но «Т. К. Борисов: жив, лишённый жизни» 2 книга дасяз.;nbsp,
Вениамин Ившин – Удмурт АССР-ысь культура удысысь дано ужась, Россиысь культура удысысь дано ужась, Удмурт Элькунлэн Кун премиезлэн лауреатэз, Дружба орденлэн кавалерез, Удмурт Элькунысь Правительстволэн литературной премиезлэн лауреатэз.