[HTML]
Экономика наукаосъя доктор, Удмурт кун университетысь профессор, УАССР-ысь наука но техника удысысь дано ужась, со туж но туж бадӟым пытьы кельтӥз шаермылэн азинскон сюресаз.
Юрий Перевощиков вордскиз Эгра ёросысь Сепож гуртын. Кыдан но будон сюресаз ассэ пӧртэм ужъёсын эскериз: тыршиз колхозын но, МТС-ын но, заводын но, вал технической секретарь но, учётчик но, мастер но. Ог дасо аръёс пӧртэм огазеяськонъёсын кивалтӥз, собере Ижысь научно-исследовательской технологической институтын тыршиз. Дышетон борды басьтӥськиз 1974-тӥ арын Удмурт кун университетын, экономикая факультетысь кафедраен кивалтӥз. Бӧрысь сое юнматӥзы экономикая факультетысь диссертационной советэн кивалтӥсе. Юрий Семёнович сюлмаськемъя Коми-Пермяк округысь Кудымкарын Удмурт кун университетлэн филиалэз усьтэмын вал.
Озьы ик бадӟым уж нуиз удмуртъёс пӧлын но тросгес экономистъёсты будэтон понна.
Юрий Перевощиков уно монографиослэн, дышетон пособиослэн, статьяослэн авторзы луэ. Солэн тыршемез пусъемын Ужысь Горд Знамя орденэн, СССР-ысь ВДНХ-лэн азвесь медаленыз но мукет данъетъёсын.
Туннэ Йӧскалык библиотекалэн йӧскалык но шаертодонъя литературая центраз Ю.С. Перевощиковен пумиськон ортчоз. Кутсконэз 13 часын.