Кызьпу арамае люкаськем калыкен пумиськонэ вуизы Ижкар администрацилэн йырызлэн воштӥсез Дмитрий Чистяков, Индустри ёрослэн кивалтӥсез Любовь Зайцева но Горький нимо гужем садлэн кивалтӥсез Сергей Буторин. Нырысь ик ужпум  ӝутӥськиз городын удмурт кылэз дышетон пумысен. Берло дыре  «Удмурт Кенеше» трос ӝожтӥськонъёс вуо, Ижкарын анай кылмылы саклык висъямысь дугдӥзы шуыса. Школаосын но анай кыллы туж ичи час сётӥське, шуо. Дмитрий Чистяков пусъемъя, Ижкарын 97 школа ужа, соос пӧлысь 16-яз удмурт кылъя но литературая урокъёс нуисько.

– Анай-атайёс школаосын удмурт кыл ӧвӧл шуыса бӧрдо, но асьсэос со пумысен нокытчы уг вазисько. Бен, одӥг нуналскын гинэ вань школаысь программаез воштыны уз луы. Городын удмурт классъёс усьтыны капчи ӧвӧл. Но нырысь-валысь луэ факультативъёс кылдытыны, - шуиз Дмитрий Александрович.

Али Ижкар администрациен ӵош туж умой ужа 97-тӥ номеро школа. Школалэн киӵолтэмез улсын удмурт кылъя урокъёс палэнысен, дистанционно амалэн радъясько. Ваньмыз пӧрмиз ке, со урокъёсты капчиен луоз мукет школаосын но меӵак возьматыны, трансляция ортчытыны – возьматыны дась гинэ мед луозы.

– Малпасько, асьмеос понна со одӥгез бадӟым вормон луоз, малы ке шуоно туннэ нуналозь тазьы ужаммы ӧй на вал. Пиналъёслэн но таӵе амалэн удмурт кылэз дышетыны мылкыд каремзы туж шӧдскымон, – пусйиз Дмитрий Чистяков.

Школаосын усьтӥсько музейёс, нимысьтыз музей комнатаос. Ижкарын соос 10 пала ни. Кылсярысь, 65-тӥ школаын ужа «Музей этнотолератности», 59-тӥ школаын удмурт калыклэн улон-вылонэзлы сӥзем сэрег вань, 57-тӥ школаынисторияя музей кылдытэмын, 17-тӥ школаын Удмуртилэн культураезлы саклык висъяло.

Али городысь ёросъёсын удмуртлыкъя трос пӧртэм проектъёс быдэсмо, возьматонъёс радъясько. Но соос малы ке вужере кылё, калык соос сярысь ичи тодэ, соин уг пыриськы. Соин ик пумиськон дыръя кенешемын та ужпум бордын ужаны.

– Ужмы мед адӟиськоз шуыса, ваньзэ ӵошен лэсьтоно. Удмуртлыкез азинтэммы потэ ке, кенешыса ужаны кулэ, – шуиз Дмитрий Чистяков.

Зэм но, валче кариськиськомы ке, тросэз ужпумъёс каньылэн интыысьтызы вырӟо. Кылсярысь, 2 ар талэсь азьло Кызьпу арама пумысен «Удмурт Кенеш» огазеяськем ужпум ӝутӥз: та интыез удмурт шӧмо, этнопарк выллем лэсьтоно, отын семьяен шутэтскыны, мугорез кыдатыны, трос калык понна ужрадъёс ортчытыны мед луоз. Вераськонъёс-эчешонъёс кема мынизы ке но, ӵошен тыршемлэн емышез кылдыны кутске ни. Со пумысен шумпотымон ивор вераз Сергей Буторин:

–Кызьпу арама городысь азбаръёсты умоятонъя программае пыриз. Озьыен, та проектэз улонэ пыӵатон понна федерал бюджетысь тросгес уксё висъяськоз. Вуоно арын арама борды кутскомы ни. Нырысь сюресъёсты тупатозы, котыр югдытозы, ӟусъёс лэсьтозы, нош собере ини инфраструктура борды басьтӥськозы.

Матысь дыре «Удмурт Кенеш» огазеяськемлэн ёзчиосызлы Кызьпу арамаез выльдонъя презентация возьматозы.