[HTML]
«Чакара» проект кылдӥз 9 ар талэсь азьло Камсьӧр удмуртъёслэн огазеяськонзылэн кичӧлтэмезъя. Но нырысь со ортчылӥз Ижын, нош 2015-тӥ арысен «ветлэ» улосъёстӥ.
– Ми дорын та ужрад ортче шуыса, трос сюлмаськизы «Чипчирган» калык ансамбльысьтымы кырӟасьёс, кудӥныз кивалтэ задор мылкыдо Надежда Моисеевна Исаева, – пусйиз «Победа» культурая дворецлэн директорез Ирина Векшина. – Ми понна бадӟым дан тамынды куноосты пумитаны.
2 нунал ӵоже «Чакара» шумпоттӥз удмурт гуръёсты яратӥсьёсыз. Нырысетӥ нуналаз ваньзы жадьытозязы эктӥзы удмурт дискотекаын. Городэн тодматскыны мылкыд карисьёс понна нимысьтыз экскурсия радъямын вал. Куноос вуылӥзы планетарие, тодмо оружейниклэн Г. Шпагинлэн музей юртаз, Дуннеысь калыкъёслэн йырпононъёсынызы корка (Дом головных уборов народов мира) но исторической музее.
2-тӥ нуналаз лыктӥсьёс тодматскизы книгаосын адӟытонэн, пыриськизы шудонъёсы но вожвылъяськонъёсы. Та нуналэ фестивалез усьтӥзы Киров улосысь но Удмуртиысь вылӥ куноос. Вань люкаськемъёсты задор номеръёсын пумитазы «Победа» дворецысь коллективъёс.
Котькуд ар фестивале тросгес но тросгес калык пыриське. Таяз арын быгатонлыкъёссэс возьматӥзы Удмуртиысь, Башкириысь, Татарстанысь, Марий Элысь, Комиысь, Пермь, Свердловск, Киров, Томск улосъёсысь, Ханты-Мансийск автоном округысь, Тюменьысь, Санкт-Петербургысь, Москваысь чебер нимо – «Зангари», «Инвожо», «Тюрагай», «Ӟардон», «Италмас», «Сактон» – аснсамбльёс. ;nbsp,Котькудзэ соос пӧлысь зал юн кичабонъёсын пумитаз но келяз. Синъёсты шумпоттӥзы яркыт буёло костюмъёссы, нош пельёсты – анай кылын быдэстӥськись гуръёс. Концерт пумын вань пыриськисьёсты пусйизы дипломъёсын но синпель кузьымъёсын.
Фестиваль зол ортчиз. «Чакараез» радъясьёс тыршизы, котькинлы соос дорын тунсыко но каньыл мед луоз шуыса. Пресс-конференциысен Удмуртиысь культурая но туризмъя министрлэн воштӥсез Петр Данилов пусйиз фестивальлэсь кулэлыксэ. Озьы ик со вераз, гуртъёсын клубъёсты одно ик возёно шуыса, уго ӵапак отын кылдо фольклормес, сям-йылолъёсмес утись национальной коллективъёс.
Ужрад йылпумъяськиз котрес ӝокен. Отчы пыриськисьёс кенешизы фестивалез азинтон амалъёс, сое паськытатон но вӧлмытон, отчы мастер-классъёс ортчытон вылысь хореографъёсты, литераторъёсты, кылбурчиосты, филологъёсты кыскон;nbsp, сярысь.
Туспуктэм:;nbsp,www.youtube.com