[HTML]

Нырысьсэ удмурт дэремъёсын уж дуразы 4 ар талэсь азьло потӥзы пургаос.

– Соку Анай кыллэн калыккуспо нуналэз ӧй вал, шуныт тулыс куазь вуэмын вал ни. Берло аръёсаз ни тупатӥмы со нуналмес праздникъя, – вера «Удмурт Кенешлэн» Пичи Пурга ёзэныз кивалтӥсь, Депутатъёслэн ёрос кенешсылэн тӧроез Василий Москвин. – Озьы ми мытӥмы калык дӥсь нуллонъя движениез. Нырысь ик кулэ вал, йӧскалык дӥськут сцена вылысь калыке мед потоз, вӧлмоз шуыса. Тодӥськом на, кызьы азьвыл, удмурт дэремен адямиез сценалэсь палэнысь адӟыса, со шоры паймыса, куддыр шузи шоры кадь учкылӥзы. Нош али ваньмыз воштӥськемын: мыскыллясьёс туннэ ми шоры вожъяськыса учко, мон но сыӵе дӥськутэн ветлысал, но мынам ӧвӧл, шуо.

Василий Москвин верамъя, пургаос Анай кыллэсь калыккуспо нуналзэ Гырон быдтонэз яке мукет удмурт праздникъёсыз кадь возьмало. Акцие мыло-кыдо пырисько ёрос кивалтӥсьёс но, огшоры калык но. Пусъёно на: азьвыл Анай кыллэн калыккуспо нуналаз йӧскалык дӥсен удмуртъёс гинэ ке ветлӥзы, али, соослэсь адӟем карыса, 21-тӥ феврале асьсэ костюмъёссэс нулло ни ӟучъёс но, бигеръёс но.

Туэ та акция борды мыло-кыдо итӥськизы мукет ёросъёс но, палэнэ ӧз кыле Ижысь «кенешчиос». «Удмурт Кенешлэн» тӧроез Татьяна Ишматова та йылолэз туж ӟечен лыдъя. Соин соглаш мукет удмурт азьветлӥсьёс но.

– Анай кыллэн нуналаз ёросысьтымы школаосын но культурая учреждениосын азьвыл аръёсы йӧскалык дӥськутэн ветлыло ни вал, нош туэ та акция паськытаз, со борды итӥськизы кивалтӥсьёс но. Унояз гурт поселениосын ужасьёс калык дӥсен вуиллям, – шуэ «Удмурт Кенешлэн» Дэри ёросысь ёзэныз кивалтӥсь Лидия Биянова. – Шумпотымон, та акцие, удмуртъёс сяна, ёросысьтымы мукет калыкъёс но пырисько шуыса.

Туспуктӥз Лидия Биянова;nbsp,