Таяз арын «Ӝужась кизилиос» лагерь ортчиз 9-тӥ пӧсьтолэзьысен 13-тӥ пӧсьтолэзёзь. Отчы пыриськизы Кизнер, Алнаш, Можга, Завьял но Грак ёросъёсысь пиналъёс. Лагере мынӥсь нылпиос одно ик кулэ тодыны удмурт кылэз, малы ке но шуоно татчы вуыло пӧртэм удысъёсын ужась удмурт дано адямиос, ӵемгес соос верасько анай кылынызы.

Кылсярысь, ми доры вуылӥзы Удмурт театрысь артистъёс Иван Плотников но Вадим Дмитриев но кивалтӥсьсы Андрей Иванович Ураськин. Иван но Вадим дышетӥзы милемыз фехтованилы. Соос мылкыдатӥзы милемыз сӥзьыл, нош ик тазьы ик ӵошен люкаськыса, «Алые паруса» спектакле ветлыны.

Лареге вуттӥськизы на Ангелина Решетникова, со кивалтэ шаерысьтымы анай кылъя дышетӥсьёслэн ассоциациенызы, нылыныз Ирина Решетниковаен но Илика внучкаеныз. Соос милемыз дышетӥзы чиньыосын керттӥськыны - со вашкала удмурт амал, пе. Со сяна, сётъязы милемлы выль кушем нимъёс. Тунсыко вал, трос выльзэ тодӥмы.

Со сяна ми дорын кунояськизы на «Шунды» огазеяськонысь азьветлӥсьёс: Максим Агафонов, Алексей Степанов, Татьяна Касаткина, Наталия Сильвестрова но правленизылэн тӧроез Алина Чернова. Соос ортчытӥзы тунсыко шудонъёс: «Кытын логика?», «Карандаш», «Вон!». Нылашъёс дышетӥзы удмурт эктонъёслы.

Нош кыӵе лагерь ортче гитаратэк? Эшлыко омырен шокатӥзы вуоно хирург Виталий Белков но вуоно чемпион Николай Сундуков.

Туж тау кареме потэ лагерез радъясьлы, «Шунды» огазеяськонлэн Кизнер ёросысь ёзэныз кивалтӥсь Елена Ивановна Марковалы, воспитательлы Анна Сергеевна Кольцовалы но лагерьлэн начальникезлы Наталья Владимировна Костиналы. Чидатэк возьмасько вуоно сменаез.