Ӟучомиськом

Со ортчиз Можга ёросысь Уча черкогуртын «Удмурт Кенеш» огазеяськон но Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась комиссия кичӧлтэмъя. Ужрадлы инты юнме шорысь быръемын ӧй вал - ӵапак Учаын 100 ар талэсь азьло ортчем дышетӥсьёслэн конференцизы, кудаз пумиськиллям но тодматскиллям Ашальчи Окиен Кузебай Герд.

Таӵе, вань удмурт дышетӥсьёсты но дышетонъя ёзъёсысь специалистъёсты огазеясь ужрадъёс, шаерамы уг ортчытъясько, но соослэн кулэлыксы туж бадӟым. Тужгес но али, анай кылъёсты дышетонъя законэ воштонъёс пыртэм бере. Ӵапак соосты сэрттон-пертчон форумлэн огез валтӥсь ужпумез вал.

- Кызьы ужано анай-атайёсын? Кызьы нылпиослэсь мылкыдзэс ӝутоно анай кылзэс ӝутыны? Та юанъёс тросмес сюлмаськыто, - вазиськиз «Удмурт Кенешлэн» тӧроез, Кун Кенешысь депутат Татьяна Ишматова люкаськемъёслы. - Малпасько, Удмурт Элькунамы национальной юан палэнтэмын яке кыкетӥ интые кельтэмын луыны кулэ ӧвӧл. Соин ик шараялэ шуг-секытъёстэс, гожъялэ, жингыртэ.

- Милям Лудорвай школамылы 2018-тӥ арын 120 ар тырме, 120 ар ӵоже ик отын дышетӥське удмурт кыл, - ивортӥз форумысен Совето Союзысь Герой А. Лушников нимо Лудорвай шор ёзо школалэн директорез Надежда Мерзлякова. - Быдӟым ож вакытэ ай, пересьёсмы тодэ ваемъя, гуртамы палэнысь лыктэм воксё ӟуч дышетӥсь Анна Касаткина шуэ вылэм: «Лыдӟе книгаосты удмурт кылын, со тӥляд анай кылды ук!». Нош соку удмурт книгаос туж ӧжыт вылӥллям, соос понна вожмаськон но потылэ вылэм.

Лудорвай школаын удмурт кыл дышетӥське ке но, гурт пумен ӟучомыны кутскиз, пусъе Н. Мерзлякова.

- Лудорвайысь нылпи садэз пытсазы, гуртысьтымы анай-атайёс пиналъёссэс Иже яке бускель гуртъёсысь садъёсы нуллыны ӧдъязы, - вера Надежда Николаевна. - Ми доры мукет интыосысь адямиос вуылыны, пуктӥськыны кутскизы. Со бордысь ик потӥз ӟучомонмы.

- Мон удмурт кылэз валаны но соин вераськыны кутски песянай-песятаелэсь, - вераз нациосын ужан политикая министрлэн воштӥсез Павел Орлов. - Но Ижын будыса, мон рос-прос вераськыны ӧй дышы. Соин ик монэ туж сюлмаськытэ юан: быгато-а мон но мон кадь удмуртъёс (кудъёсыз ваньзэ валало, но вераськыны сокем уг пӧрмыто), песянай-песятай луыса, внукъёсмылы анай кылмес выжтыны? Ум. Со туж бадӟым шугъяськон. 

- Мынам песяе ӟуч кылэз чик уг тоды вал, со улытозяз мордва сямен гинэ вераськылӥз, - шуиз люкаськемъёс азьын Кун Кенешлэн Тӧроез Алексей Прасолов. - Куке мон, школаын дышетскись маке, гужемъёсы со доры ветлӥсько вал, ми песяеным ог-огмы шоры дол-дол учкылӥм, нош пал кыл но вераны ум быгатӥське вал, малы ке шуоно мон мордва кылэз ӧй тоды. Песяе кемалась ӧвӧл ини. Нош табере внукъёсы понна мордва кыллы кыӵе мынэсьтым дышетӥсь?

Жаляса верано, туннэ нуналлы бадӟымъёс пӧлын но, пичиос пӧлын но кылэз валась, но соин вераськисьтэм адямиос ӧжыт ӧвӧл.

Балезино ёросысь Исак шор ёзо школаысь удмурт кылъя но литературая дышетӥсь Татьяна Захарова куректонзэ вераз, таш-таш удмурт гуртазы но пиналъёс ӟучесь будыны кутскизы шуыса. Песяй-песятайёссы, анай-атайёссы, быгатыса-а, быгатытэк-а, тэшкылиосынызы ӟучен бӧтьырто, пе. Таӵе югдур Исакын гинэ ӧвӧл, ёросысьтызы мукет гуртъёсын но, шуиз Татьяна Витальевна. Нош умоятыны сое нокинлы - ёрос администрациын национальной юанъёс понна кыл кутӥсь специалист ӧвӧл. Озьы ке но ассэ Т. Захароваез вератэк кельтэм уг поты вылэм: шуг-секытъёссы шоры учкытэк, солэн дышетэм пиналъёсыз удмурт кылъя но литературая олимпиадаосын, вожвылъяськонъёсын котьку 1-тӥосыз пӧлын луо, уноез дышетскыны пыро Удмурт кун университетысь удмурт филологияя, финно-угроведениея но журналистикая институтэ.

Ӧпкелёно медаз лу

Форум Можга ёросын ортчиз бере, отысь югдурен тодматӥз Можга ёросысь Депутатъёслэн кенешсылэн тӧроез Галина Королькова.

- Ёросамы удмурт кыл пӧртэм сямен дышетӥське: урок, факультатив, кружок чотын, - ивортӥз Галина Петровна. - 50 процентлэсь уноез дышетскисьёс но 50 пала процент нылпи садъёсы ветлӥсьёс дышето сое анай кыл чотын. Ми дорын радъясько удмурт ужрадъёс, акциос.

Форуме лыктэмъёс Можга палъёсысь вань гуртъёсысь югдурен тодматскыса ӧз вуттэ, озьы ке но Уча черкогуртын кылдэмез сокем уг шумпотты: отын но пиналъёс удмурт кылэз дышетыны мылкыд туж уг каро. 

- Ми дорын 11 пӧртэм калыкъёс уло, - ивортӥз Можга ёрослэн азьвыл йырыз, али - «Россия» огазеяськонлэн кивалтӥсез Аркадий Вершинин. - Татын, удмуртъёсын но ӟучъёсын артэ, кылем даурлэн 80-тӥ аръёсысеныз тупаса уло болгаръёс, румынъёс но мукетъёсыз.

Соин но, дыр, учаос ваньзы огъя, валамон кылэ выжыны дырто, асьсэ анай кылъёссэс палэнтыса. Но таӵе югдур залэ люкаськемъёслы ӧз яра.

- Мон малпасько, анай-атайёс пӧлын валэктон уж ортчытэм, кенешем бере Учаын но 1 ке но удмурт класс люкаськысал, дыр, - малпанзэ шараяз «Удмурт Кенешлэн» тӧроез Татьяна Ишматова.

- Котькуд школа дышетскон планзэ ачиз гожъя. Валамон, вань одӥгез, кудзэ ми соослы ӵектӥськом, но часъёсыз соос вошъяны быгато, - шуиз дышетонъя но наукая министрлэн воштӥсез Ирина Крохина. - Со планъя удмурт кылын вераськисьёслы анай кылзэс дышетонлы 4 час висъяське, вераськисьтэмъёсызлы - 3 час. Школа со часъёсты ачиз люкылэ ини: тросгес дышетоно кылэз яке литератураез.

И. Крохина верамъя, туннэ нуналлы шаерамы 27 сюрслэсь уно пиналъёс удмуртэз дышето, соос пӧлысь 18 пала сюрсэз - предмет чотын, 9 сюрслэсь уноез - факультативъёсын яке кружокын. Но валамон, туэ куарусёнэ ини та лыдпусъёс чутрак воштӥськыны быгатозы, уго табере котькуд анай-атай нылпиез понна заявление гожтыны кулэ, кудаз пусъёз, кыӵе кыл со понна анай кыл луэ. Вань пичи кылъёсын оградын анай кыл чотын дышетӥськоз ӟучез но - сое юнматӥз туэ гужем кутэм закон.

- Соя анай кыл дышетскон программаын одно дышетон предметъёс пӧлын кылемын, - валэктӥз Кун Думаысь депутат, история тодосъя доктор Алексей Загребин. - Ӟуч кыл султӥз анай кылъёсын оградэ.

Депутат валэктэмъя, та законэз кутоно луиз, малы ке шуоно кунысьтымы куд-огаз элькунъёсын кун кылэз одно ик дышетон сярысь законэз шонертэм, асьсэлы кызьы умой валаллязы, кужмысь кун кылъёссэс дышетытӥзы. Асьме дорын сыӵе югдур ӧй вал.

- Элькунамы улӥсь мукет калыкъёс но, шуом, азербайджанъёс, пусъё, мукет улосъёсын ӵошатыса, Удмуртиын улыны майбыр шуыса. Мукет улосъёсын соос асьсэды, татын кадь умой, уг шӧдо, пе, - ивортӥз дышетонъя но наукая министрлэн воштӥсез Ирина Крохина. - Ваньмыз со - тӥледлы, ӟеч сямдылы луыса.

Форумын уно ӵектонъёс, сюлэмшугъяськонъёс шараямын вал. Соин ужрад пумын вань люкаськемъёс огкылэ вуизы: Удмуртилэн Тӧроезлы вазиськон гожтоно, элькунысьтымы Дышетонъя но наукая министерствоын национальной дышетон понна кыл кутӥсь нимаз ёз мед луоз но министрлэн огез воштӥсез та юанъёсты чакласа мед возёз шуыса.

Кылмес утён понна али сюлмаськоно, бӧрысь ӧпкелёно медаз лу шуыса. Уноез удмурт кылъя дышетӥсьёс тае ӟеч валало.

   Фото: Кун Кенешлэн пресс-службаез