Ужрадэ "Удмурт Кенешлэн" ёзчиосыз, Кун Кенешысь депутатъёс, дышетӥсьёс, Кузебай Герд нимо гимназиысь дышетскисьёс, журналистъёс но трос мукет мылкыд карисьёс пыриськизы.

Люкаськемъёс азьын шуныт кылъёссэс веразы "Удмурт Кенеш" огазеяськонлэн Тӧроез Татьяна Ишматова, Кун Думаысь депутат Алексей Загребин, Кузебай Герд нимо йӧскалык музейлэн кивалтӥсез Александр Волков, Кузебай Герд нимо гимназилэн кивалтӥсез Татьяна Волкова.

- Кузебай Герд - со одӥгез дано югдытӥсьмы луэ. Соин ик сое вунэтоно ӧвӧл, солэсь ужзэ асьмелы азинтоно. Туннэ таин выро "Удмурт Кенеш" но, Йӧскалык музей но, Йӧскалык библиотека но, Кузебай Герд нимо гимназия но. Оглом вераса, ваньмы - анай кылзэс, ас калыксэс яратӥсь вань удмуртъёс. Солэсь ужзэ ӧм ке азинтэ, луоз-а меда азинлыкез асьме элькунмылэн, асьме калыкмылэн, - вераз Татьяна Ишматова.

Со данъяськыса но шумпотыса пусйиз на, Кузебай Гердлэн вордӥськем нуналэз табере катэн юнматэмын, шаерамы со памятной дата, дано нунал луэ шуыса.

Солэсь ужзэ одно азьланьтоно шуиз Алексей Загребин но:

- Кузебай Герд косӥз асьмелы данъяськыны удмурт луэменымы, анай кылынымы, удмурт лулчеберетэнымы но музъеменымы. Та веранысьтыз одӥг кылзэ но уд кушты, одӥг кыл но уд ватса, азьланьтод гинэ. Азьланьтом солэсь ужзэ.

Ужрадэ зэм но, удмуртлык понна висись, Кузебай Гердлэсь ужзэ азинтон понна сюлмаськись муртъёс люкаськизы шуыса пусйиз Татьяна Волкова. Оскисько, арысь аре татчы эшшо но тросгес адямиос люкаськылозы шуиз со.

Ужрадэз йылпумъяса, гимназиысь нылпиос Кузебай Гердлэсь кылбуръёссэ шара лыдӟизы, люкаськемъёс синпелетэз доры сяська понӥзы. Нош бӧрысь мылкыд карисьёсты Йӧскалык музее ӧтчазы. Туннэ отын вань адӟытонъёсты дунтэк учкыны луэ вал.