Паймытӥзы ижора нылпиос

Со арлы быдэ радъяське но пӧртэм калыкъёсты люка. Таяз радэ доразы кунояськизы комиос, карелъёс, ингерманландецъёс но удмуртъёс. Шаерысьтымы ужрадэ ветлӥз Кияса ёросысь Уддяди гуртысь «Инвожо» ансамбль.

- Ми азьвылгес Эстониын тодматскимы вал ижораосын, нош туэ соос милемыз куное ӧтизы, - вера «Инвожо» ансамбльлэн кивалтӥсез Надежда Пахомова. - Туж ӟеч пумитазы, кузямы ветлӥзы. Удмуртъёс кадь ик, куноосты пумитаны ярато но быгато вылэм. Ми сяна, соос доры ветлӥзы карелъёс, Санкт-Петербургысь комиос, Гатчинаысь ингерманландецъёс.

Котькудӥз ансамбль празднике вуэмъёсты тодматӥз ас калыкезлэн культураеныз, сям-йылолъёсыныз.

- Кырӟам-эктэм сяна, ми шудонъёс, мастер-классъёс возьматӥмы, - вера Надежда Викторовна. - Быдэс калыкмылэсь данзэ утиськом бере, тыршиськом культурамес чебер адӟытыны. Эктонмес возьматэммы бере дорамы лыктӥсьёс вал: эктондэс дышетысалмы но дорады куное вуылысалмы, пе. Культураосын тодматсконлы 1 нунал ӧзгес тырмы, тросгес дыр кулэ вал.

Фестивалез ортчытэм сяна, куно пумитасьёс тыршизы та нуналэ быдэсак улэмзэс возьматыны, со понна лыктэм эшъёссэс нуллӥзы гуртысьтызы ик ижора калыклы сӥзем музее.

- Ижораос туж ӧжыт ке но кылемын ини, соос пӧлын но вань на кылзы но культуразы понна сюлмынызы висисьёс, - азьланьтэ Надежда Пахомова. - Кылсярысь, азьветлӥсьёссы ижора калык дӥсен ветло, ижора корка пукто. Туж шумпотымон но пусйымон вал, куке пичи пиналъёс сцена вылын ижора кылын кырӟан быдэстӥзы. Озьы ке но кылзэс утьыны но азинтыны тыршо.

Синмаськизы французъёс

Фестиваль йылпумъяськем бере «инвожоос» Санкт-Петербурге ширтӥзы, отын соосты «кенешчиос» возьмало ни вал.

- Санкт-Петербургысь удмуртъёс милемлы нимысьтыз экскурсия радъязы. Ваньмылэн со городэ вуылэммы но ӧй вал на - паймим но, синмаським но солы, - вера Надежда Пахомова. - Со вакытэ ик кунамы футболъя дунневыл чемпионат мынӥз, пӧртэм кунъёсысь уно висисьёс лыктэмын вал. Милемыз, калык дӥсен адӟыса, ну, туспуксё ук, чебер шуо! Нош француз пиос воксё сьӧрамы ветлӥзы.

Санкт-Петербургын но «инвожоос» шутэтскыса гинэ ӧз улэ - шулдыртӥзы калыкез Летний садын. Мынӥсь-ветлӥсьёс, пе, калык дӥськутсэс адӟыса, кудӥз эшъёсызлы видеоӟечкылан лыдӟыны куриз, Курскысь нылъёс эшсылы сюан нуналэныз удмурт кылын ӟечкылан вератӥллям. Бӧрысь «инвожоосты» ӧтчаллям на Санкт-Петербургысь Калыкъёслэн юртазы (Дом национальностей) нылпиос понна удмурт эктонъёсъя мастер-классъёс но шудонъёс ортчытыны.

- Кытчы гинэ ӧм вуылэ, кин гинэ милемын ӧз вераськылы, ваньзылы ивортылӥм Санкт-Петербургын ортчоно Гербер праздник сярысь, удмурт шулдыръяськонэ одно ик мед вуылозы шуыса, - вера Надежда Викторовна. - Отын ини культураенымы эшшо матысьгес тодматскоды, шуим.