Нош али со юртын кырӟанъя но эктонъя «Айкай» театр но Йӧскалык библиотекалэн одӥгез филиалэз интыясько.

Ужась группае пырисьёс - «Удмурт Кенешлэн» тӧроез Т. Ишматова, культурая но туризмъя, нациосын ужан политикая министръёслэн воштӥсьёссы П. Данилов но П. Орлов «Айкай» театрлэн директорез О. Шибанова, удмурт азьветлӥсь П. Поздеев но мукетъёсыз - юртэз быдэсак котыртӥзы, эскеризы, кытын мар интыяськыны быгатоз, кыӵе кабинетъёсыз азьвыл сямен кельтыны луоз, нош кудъёссэ огазеяно, марзэ тупатъяно. Туннэ нуналлы ӝыны юрт шунтӥське, отысь висъетъёсын ужаны луэ, нош мукет люкетаз кезьыт, борддоръёсысь штукатуркаез куашка, вӧлдэтэз интыен-интыен воксё ӧвӧл.

Мар луоз удмурт культурая центрын туннэ нуналлы пумозяз тодмо ӧвӧл на, но али гижысь-пиньысь ужано ни технической задание бордын, соя лэсьтӥськисьёс тупанъян ужъёсты кутскыны быгатозы.

Удмурт культурая центрез кылдытон бордын ужъёс 2018-тӥ арын мытэмын луыны кулэ, нош йылпумъяно соосты 2020-тӥ арозь.