Та юртын ортчиз кыкетӥез суд "Мултан ужъя".


    Пумиськонлэн мугез бадӟым - 100 ар талэсь азьло, 1918-тӥ арын инвожо толэзе, Елабугаын ортчиз Россиысь удмуртъёслэн нырысетӥ ӧтчамзы. Калыкмылэн историяз со бадӟым инты басьтэ, уго ӵапак отын эскериськизы удмурт культураез, кылэз, эм удысэз азинтон сярысь юанъёс, но тужгес валтӥсез - отын делегатъёс огкылэ вуизы, удмуртъёслы нимысьтыз автономия кылдытоно шуыса. Нош 1920-тӥ арын 4-тӥ шуркынмонэ гожтэмын вал Декрет Вотской автономной область кылдытон сярысь.

Туэ 18-тӥ куартолэзе Елабугае люкаськозы Удмуртиысь но Татарстанысь, озьы ик мукет улосъёсысь тодмо тодосчиос, удмурт азьветлӥсьёс, дышетӥсьёс но дышетскисьёс, шаерчиос но гожъяськисьёс. Нырысетӥ удмурт съездлэн кулэлыкез но сэрттэм ужпумъёсыз, сое радъясьёс, озьы ик Елабугалэн калыкенымы герӟаськемез сярысь докладъёс лыдӟозы Удмуртиысь тодмо тодосчиос А. Шкляев, М. Атаманов, Казаньысь В. Хазиахметова но мукетъёсыз. Ужрадысен нырысьсэ пумиськозы удмурт азьветлӥсьёслэн - Трокай Борисовлэн но Иосиф Наговицынлэн - нырысетӥ ӧтчамез радъясьёслэн - ӵыжы-выжыоссы.

Конференция йылпумъяськем бере вань мылкыд карисьёс быгатозы тодматскыны Елабугалэн тунсыко интыосыныз. Радъясьёс тыршозы возьматыны городысь удмуртъёсын герӟаськемъёссэ интыосты. Кылсярысь, отын али но сылэ на судлэн юртэз, кудаз 1895-тӥ арын Мултан ужъя кыкетӥез процесс ортчиз. Озьы ик адӟыны луоз, кыӵе юртын потӥз «Гудыри» газетлэн нырысетӥ номерез.

Елабугаысь улосвылкуспо научно-практической конференциез радъяло «Удмурт Кенеш» огазеяськон но Татарстанысь удмуртъёслэн «Кенеш» автономизы.