Конференцилэн ужаз пыриськизы Ижкарысь но ёросъёсысь егитъёс - "Шунды" ёзэтъёслэн азьветлӥсьёссы, правлениезлэн ёзчиосыз. Люкаськемъёсты пумитаса вераськизы йӧскалык политикая министр Эдуард Петров, "Удмурт Кенеш" огазеяськонлэн Тӧроез Татьяна Ишматова.

""Шунды" огазеяськон удмурт движенилэн улоназ тужгес но бадӟым инты басьтэ. Асьмелэн азьланьмы ноку но уз луы егитъёсын ужмес ӧм быгатэ ке ӧръяны, ӧм быгатэ ке сое валтыны. Зэм, мерлыко огазеяськон со капчи уж ӧвӧл, малы ке шуоно татын туж трос кылкутонъёс луо, паськыт ужез быдэстыны дыр но, мылкыд но кулэ. Соин ик "Удмурт Кенеш"-лэн нимыныз вазиськеме потэ, ми котьку тӥледлы дась юрттыны шуыса. Мед огазеяськозы вань егитъёс, со студентъёс гинэ медаз луэ вылэм, правление пыртыны ӵектысал мукет ӧръёсысь егитъёсты но. Удмуртлык понна тыршись егитъёсмы тросгес мед луозы. Асьмеос пӧртэмесь, улон шоры но учкыны одӥг кадь ум быгатӥське. Но куке пӧртэм адямиос быгато ӵошен, эчешонъёс пыр одӥг кылэ вуыны - со бадӟым шуд. Ӵошен гинэ асьмеос быгатомы ужмес юнматыны, азинтыны. Оскисько, "Шунды"-лэн сюресэз азьпалан туж паськыт луоз на ай шуыса. Огазеяське удмурт егитъёс! Котьку мед пиштоз Шунды!" - вазиськиз егитъёс доры Татьяна Витальевна.

Туннэ егитъёс "Шунды" огазеяськонлэн одӥг ар ӵоже ужамезлы йылпумъянъёс лэсьтӥзы, азьвыл кивалтӥсез вераз кыӵе проектъёс радъямын но ортчытэмын та дыре, озьы ик шараямын вал шуг-секытъёс но.

Со сяна огкылысь быръемын вал огазеяськонлы выль правление, совет но тӧро. "Шундыен" кивалтыны оскемын Флор Васильев нимо библиотекаысь ӧнерчилы, егит азьветлӥсьлы Виолетта Анисимовалы.

"Мон вордӥськи Татарстанын, но удмуртлык сюлэмме кыскиз но, шӧдтэк шорысь Удмурт Элькунэ вуи, Удмурт кун университетын дышетски, собере эшшо тӥни удмурт библиотекае ужаны лыктӥ. Озьы кылдэмын но, дыр. Туннэ туж зол тулкымъяськисько, малы ке шуоно вылам туж бадӟым кылкутон. Ӵошен лад-лад ужмес лэсьтыны тыршом. Удмуртлыкмы понна капчи, эшъяськон мылкыдын тыршом ужаны" - шуиз "Шунды" огазеяськонлэн выль кивалтӥсез.