Кемалась ӧвӧл глазъёс «ДондыДорлэн воршудъёсыз» проектэнызы Президентлэсь грантсэ утӥзы. Со улсын туэ тулыс воршудъёслы сӥзем конференция ортчытӥзы ни, нош гудырикошконэ, та темаез ик азьланьтыса, выль ужрадъёслы дасясько: воршудъёслэн пумиськонзылы но «Тыло толэзь» фестивальлы.

- Ми огшоры гинэ воршуд темаез ӧм быръелэ, - вера проектлэн авторез Альбина Баженова. - 2002-тӥ арысен кутскыса, арлы быдэ потамы экспедициосы шаермылэн уйпалаз. Глаз ёросэз гинэ ӧм котыртэ, бускельёсаз но вуылӥмы. Тодматскимы гурт но инты нимъёсын, но котькуд юалляськонъёсмы вутто вал воршуд сярысь вераськонъёс дорозь. Соин мур но мур эскерыны кутскимы та темаез. Пӧртэм тодосчиос верамъя, ми палан пумисько вылэм 50 котыр воршудъёс (ми экспедициосамы 35-сэ шедьтӥмы), соос котырын ик удмуртъёслэн улонзы бергаз. Нош али ваньзы сямен соос вунэтэмын. Ми малпамъя, со воршудэз ыштон гинэ ӧвӧл, со удмуртлыкмес ыштон. Соин сэрен кылдӥз проектмы. Со пыр ми воршудъёсыз улӟытыны ум малпаське - валаськом, ум быгатэ, ма, со али кулэ но ӧвӧл ни шуыса. Ми тыршомы удмуртлыкмес ӝутыны.

Ужрадъёсты радъясьёс верало, нокин, пе, уг оскы вал, али воршудъёсыз люканы но тодыны луоз на шуыса. Но глазъёс туж шумпото быдэстӥськись ужзылы.

- Оштолэзе ортчем конференцимы бере уноез отчы пыриськемъёс воршуд темаен тунсыкъяськыны, воршудъёс сярысь юалляськыны ӧдъязы, - вера Глаз ёросысь культурая но туризмъя центрысь методист Ольга Боталова. - Соосты выльысь огазе люканы малпамы 25-тӥ августэ. 12 часын ужрадмы кутскоз. Нырысь ик усьтомы выль кылдытэм «ДондыДор» паркмес. Бӧрысь лыктэм делегациослэн шествизы луоз, котькудӥзлы тӧро быръёмы. Нунал ӵоже делегациос асьсэ воршудзылы визитной карточказэс возьматозы, нош тӧрооссы нимаз кенеше люкаськылозы но кутозы ужрадлэсь резолюцизэ. Та нуналэ одно ик вӧсялом но сиём ӝук.

Радъясьёс верамъя, паркын нуназеысен ӝытозь ужалозы туспуксён площадка, ортчозы пӧртэм шудонъёс, хороводъёс но концерт.

Та нуналэ ик паркын луоз «Тыло толэзь» рок-фестиваль, кутскон солы сётоз чеберайёс вискын ёроскуспо «Тыло толэзь» вожвылъяськон.

- Та конкурсмы туэ 2-тӥзэ радъяське, - вера Ольга Боталова. - Кылем арын отчы Глазысь но Глаз ёросысь нылъёс но кышномуртъёс пыриськизы ке, туэ со луоз ини ёроскуспо. Ужрадамы лыктозы кӧня ке ёросъёсысь 18-35 аресъем нылъёс. Туннэ нуналлы конкурсамы 8 заявкаос вуизы. Чеберайёслы визитка дасяно, этнической шӧмо купальникен ветлоно луоз.

Со сяна, радъясьёс дасяло нылъёс понна кыӵе ке транспортэн (кыӵе - азьвыл ик уг верало, но кылем арын со мотоблок вылэм) ветлыны быгатэмзэс эскерись конкурс но конкурс-сюрприз - таяз но мар луоз уг иворто. Кузьымъёс ӟечесь луозы, шуо.

Конкурс бере кутскоз ачиз фолк-рок фестиваль но йылпумъяськоз нунал тыл шоуэн.