Назад к Новостям
06.08.18

10-тӥ арзэ ини гудырикошконлэн нырысетӥ кӧснуналаз Киров улосысь Слободской ёросысь Гырдор (Светозарево) гуртын «Выль ӝук» праздник ортчиз. 

Гырдор нош ик куноятӥз ӝукен

Туэ со люказ Слободской но мукет ёросъёсысь 3 сюрс пала адямиез - удмуртъёсты гинэ ӧвӧл, мукет выжыосты но.

Празднике лыктэмъёсты ӟечкылаз, ӟеч мылкыд сӥзиз Удмуртиысь нациосын ужан политикая министрлэн воштӥсез Павел Орлов. Со осконзэ вераз, котьку но тазьы ик пӧртэм калыкъёс эшъяськыса, тупаса улӥзы ке, асьмеос нокыӵе кышкытлыкъёслы ум сётӥське шуыса.

- Туж шумпотымон, палэнын улыса но, тӥ анай кылдэс, сям-йылолъёсмес утиськоды, мукет калыкъёсты соосын тодматӥськоды шуыса, - ватсаз Удмуртиысь Эшъяськон юртысь ёзэн кивалтӥсь Ольга Степанова.

Огшоры учкисьёсты сяна, «Выль ӝук» огазеяз на пӧртэм кырӟась коллективъёсты. Кылсярысь, гала-концертэз ворсаны дан усиз Удмуртиысь ансамбльлы.

- Ми туэ «Выль ӝуке» 2-тӥзэ лыктӥмы. Кылем арын туж кельшиз но, туэ мед ӧтёзы на вал шуыса, улӥмы. Татын ми асьмеды дорын кадь шӧдӥськом, - вера Вавожысь «Гербер» ансамбльысь кырӟась Олег Попов. - Кылем арын туж трос коллективъёс вал, соин таяз радэ ми ӧжыт гинэ номер дасямы. Нош туэ коллективъёс трос ӧвӧл, эшшо быгатонлыкъёсмес возьматоно на вылэм.

Удмурт коллективъёс сяна, люкаськемъёсты шулдыртӥзы на пор, коми-пермяк но ӟуч кырӟасьёс.

Нимысьтыз концерт пуктӥз Удмуртиысь лыктэм куно Иван Котельников. Люкаськемъёс солы тужгес шумпотӥзы, уго уноез кылылӥллям ни кырӟанъёссэ, нош улэпкын кылзыны артистэз луонлыксы вылымтэ на. Соин уно туспуксизы, вуоно арын нош ик лыктыны куризы.

Иван Котельников бере праздниклэн «эрико микрофон» люкетэз кутскиз. Отын вань мылкыд карисьёс быгатӥзы, сцена вылэ тубыса, асьсэлэсь быгатонлыкъёссэс возьматыны: кырӟаны, эктыны. Шумпотымон, ужрадлэн нимысьтыз та люкетаз уно кырзась-эктӥсьёс вуиллям шуыса, уноез соос удмурт кырӟанъёсты быдэстӥзы.

«Выль ӝук» удмурт калыкез огазеян понна радъяське ке но, котькуд ар отчы мукет калыкъёс но вуыло. Кылсярысь, «Батыр-шоуэ» арлы быдэ пыриське Закаринье черкогуртысь ӟуч воргорон Василий Якимов.  

- Мон батыръёслэн ӵошатсконазы туэ 4-тӥзэ ворми, котькуд ар вормыны шуыса лыктӥсько, - вера воргорон. - Сьӧрам висьыны матысь адямиосы ветло, таяз радэ анае, нылы но эшъёсы вуылӥзы. Тужгес секыт йӧтӥз берпуметӥез конкурс, куке батыръёс сцена шорын одӥг кульчоям гозы шоры кутӥськизы, нош сценалэн сэрегъёсаз тӧдьы ныркышетъёсын нылъёс сылӥзы. Кудӥз воргорон со ныркышетэз басьтыны быгатӥз - со ик вормиз.

- Кульчоям гозы сярысь мон атаелэсь кылӥ, со вераз, азьло дыръёсы сыӵе ӵошатсконзы вал шуыса, - вераз шулдыръяськонэз радъясь, Гырдор поселенилэн йырыз Андрей Соловьев. - Мон соку ик та конкурсэз улӟытоно кариськи.

Батыръёс куспын сяна, вожвылъяськонъёс ортчизы семьяос, пиналъёс пӧлын но.

- «Выль ӝук» калыкмылы туж яраз, соин 10 ар ӵоже ини уноез та нуналэ вордскем палъёсазы берто, праздник люкаськон интылы пӧрмиз, - вера Гырдорын улӥсь Галина Соловьева. - Умой, шулдыръяськонамы шутэтскон люкетэз но, йылолъёсыз но вань шуыса.

Зэм но, котькудаз «Выль ӝукын», азьвыл дыръёсы сямен ик, пӧзьто но вӧсяло ӝукез. Кӧня ке арзэ ини гырдоръёс та ужез оско Серафим Болтачевлы.

- Мон ӝукез тылскем вылын пӧзьтӥсько, - вера мӧйы воргорон, азьвыл дышетӥсь. - Бадӟым пуртыысь ми сое кӧня ке кастрюляосы тыриськом но вӧсяськом. Азьвыл вӧсяны черкысь поп вуылэ вал, али асьмеос тыршиськом, молитва лыдӟиськом. Собере вӧсям ӝукмес огъя пуртыосы понӥськом, вань пӧзьтэм ӝукмы мед вӧсяськоз шуыса.

Та сиён вань лыктэмъёс пӧлын люкылӥське, арысь аре сое трос пӧзьто, ваньмызлы мед тырмоз шуыса. Нош мукет удмурт сиёнъёсты дунын басьтоно. Куд-огез, пе, юри табань яке дуро шаньги (перепеч) веръяны потэ.

- Мон туннэ 10 часысен 2 бадӟым ведра табань пыжи, - вера Людмила Кожина. - 3-тӥ арзэ ини тазьы потай, вуонояз уг ни мыны, дыр, - акыльтӥ. Калык уг чида, вӧзам копак люкасько, люкето. Туннэ юн трос адями ветлӥз. 2 ведра ыльняне бырем бере 3-тӥзэ котӥм, сояз йӧлмы ӧз тырмы ни, вуэн-курегпузэн гинэ пыжи на, созэ но октӥзы.

Нош дуро шаньгиоссы вазь ӵукна ик быриллям - соосты шулдыръяськисьёс кӧня ке минутскын овӧлтӥллям.   

Праздник ӵукнаысен ӝытозь кыстӥськиз, калык берло но ӧз дырты дораз бертыны. Возь вылын программа йылпумъяськем бере вань мылкыд карисьёс шулдыръяськизы на дискотекаын, со радъяськиз Гырдорысь культурая юртын. 



Вступайте в наши группы в соцсетях

Присоединяйтесь