Та премиен арлы быдэ удмурт лулчеберетэз, сям-йылолъёсты азинтӥсь но утись, удмуртъёслэсь шуг-секытъёссэс сэрттӥсь-пертчись, калыкъёслэсь эшлыко кусыпъёссэс юнматӥсь муртъёсты дунъяло. 2020-тӥ ар понна данъетэз сётӥзы Глафира Никольскаялы.

Никольская Глафира Николаевна - педагогика наукаосъя доктор, профессор, Россиысь но Удмуртиысь тодос удысысь дано ужась, дышетонъя программаослэн но книгаослэн, удмурт кылъя учебникъёслэн но монографиослэн авторзы. Солэн тыршемез улсын 200 пала наука ужъёс кылдэмын. Нош кӧня дышетӥсьёсты, педагогъёсты, тодосчиосты будэтӥз Глафира Николаевна. Тросэз тодосчиос али асьме элькунамы уло, дышетон удысын ужало, учебникъёс поттон бордын тыршо. Пусйытэк кельтыны уг луы, Глафира Николаевна 90-тӥ аръёсы быгатӥз огазеяны Москваысь удмуртъёсты. Солэн кичӧлтэмезъя отын кылдытэмын "Герд" огазеяськон.