Люкаськемъёс азьын вераськиз ёзэтмылэн кивалтӥсез Людмила Коконова. Со 2022-тӥ ар куспын ортчытэм ужрадъёсынызы но 2023-тӥ арлы чаклам ужпумъёсынызы тодматӥз. Людмила Коконова пусйиз, соос огкылысь ужало "Шунды" дэменлыклэн ёзэтэныз, ӟуч, бигер но пор огазеяськонъёсын. "Удмурт Кенешлэн" ёрос ёзэтэзлэн кичӧлтэмезъя лулчеберет но дышетон удысъёсын трос пумо ужъёс нуисько, радъясько пӧртэм фестивальёс, тунсыко пумиськонъёс, сяме пырем йӧскалык шулдыръяськонъёс, конкурсъёс. "Шумпотӥсько, Кияса ёрос газетын выльысь печатласькыны кутскиз удмурт кылын "Италмас" ватсэтмы. Озьы ик кылем арын ЗАГС-ын нырысьсэ удмурт кылын регистрация ортчиз. Солы нимысьтыз сценарий гожтэмын вал, вашкала сюан йылолъёсты но Кияса ёросысь удмурт кырӟанъёсты пыртыса", - шуиз Людмила Коконова. Азьпалан озьы ик чакламын пиналъёс, егитъёс, анай-атайёс пӧлын удмурт кылэз, культураез утён пумысен валэктон ужъёсты золгес нуон, Кияса ёросын удмурт газет-журналъёслы гожтӥськонэз будэтон, ошмесъёсты утёнъя "Мынам ошмесо шаере" акцимес азинтон но трос мукет ужрадъёс. Иван Сибиряков кенешчиослы мыло-кыдо ужамзы понна тау кариз, азьпалан проектъёс бордын кужмогес ужаны дэмлаз. VK:08234