"Удмурт Кенеш" огазеяськон но Йӧскалык прессалэн юртэз ялӥзы гожъяськисьёс пӧлын «Гожъя удмуртсэ» конкурс. Конкурс радъяське 2 номинацияя: - Кылбурет (ӧжытсэ келяно вить кылбур яке одӥг поэма) - Вакчи проза (верос, эссе яке очерк). Темаез – эрико. Вань произведениос одно ик удмурт кылын гожтэмын луыны кулэ. Конкурсэ пыриськыны быгато 12 арескысен вань мылкыд карисьёс, соос писательёслэн, журналистъёслэн профессиональной огазеяськонъёсазы уг пыро, гожъяськон удысын уг ке ужало. Ужъёс дунъяськозы куинь группая: 12-18 аресъемъёс 18-35 аресъемъёс 35 ареслэсь бадӟымъёс Ужъёс кутӥськозы 30-тӥ куартолэзёзь (маёзь). Пиналъёс пӧлысь кык устоосыз авторъёс (вормисьёс) мынозы «Шундыкар» лагере. Кык мукет группая быръемын луозы быдэн куинь вормисьёс. Соос пусъемын луозы Дипломъёсын но «Удмуртия» издательстволэн книга магазиназ сертификатъёсын: 1-тӥ инты понна – 4000 манет, 2-тӥ инты понна – 3 000 манет, 3-тӥ инты понна - 2 сюрс манет. Озьы ик куинь тужгес усто выль авторъёслэн ужъёссы нимаз книгаосын поттэмын луозы! Дунтэк! Быръёмы сыӵе авторъёсты, кинлэн та дырозь одӥг книгаез но ӧй вал на. Йылпумъянъёс лэсьтэмын луозы 31-тӥ мае, вормисьёсты данъян ужрад ортчоз Ижкарын 12-тӥ июне. Тодады вайытом, «Удмурт Кенеш» огазеяськонлэн «Лыдӟы удмуртсэ» проектэз утӥз Президентлэн Лулчеберет удысысь кичӧлтонъёсъя фондысьтыз грант. Сое дасяз Йӧскалык прессалэн юртэз. Проект улсын ортчытэмын луозы конкурсъёс, гожъяськисьёс понна семинаръёс, Лыдӟисьёслэн фестивальзы, визь сынан но мукет.