— Мон ваньдэсты ӟечкыласько та быдӟым нуналэн – кунлыкмылэн 100 ар тырмонэныз. Асьмеос сое кема возьмам. 100 ар — со паськыт сюрес, со трос адямиос, кудъёсыз ортчизы но трос лэсьтӥзы калыкмы но шаермы понна. Мон шумпотыса ӟечкыласько асьмеды асьмелэн таӵе нуналмы вань шуыса, асьмеос огазьын шуыса, — ӟечкылаз люкаськемъёсты «Удмурт Кенешлэн» президентэз Татьяна Ишматова.

Автономиез кылдытӥсьёсты йыбырттыны озьы ик вуизы Кун Думалэн депутатэз Алексей Загребин, Федерациия Кенешысь сенатор Юрий Фёдоров но мукетъёсыз.

Та нуналэ сяськаосын шулдырмиз Трокай Борисовлэн Ижысь памятникез но. Татын озьы ик люкаськизы «Удмурт Кенеш» огазеяськемлэн ёзчиосыз.

Вераны кулэ, удмурт азьветлӥсьлы Трофим Кузьмичлы синпелет пуктэмын вал 120 ар тырмонзлы сӥзьыса. Со сярысь тодэ ваёнъёссэ вераз Николай Мусалимов – ӵапак со вакытэ кивалтӥз «Удмурт Кенеш» огазеяськемен:

— Та памятникез пуктон сярысь малпан азьлогес кылдӥз вал: Трокай Борисовлы 100 ар тырмон дыръя Алнашын ортчем ужрадын. Синпелетэз пуктон капчиен ӧз мыны, озьы ке но уж быдэстэмын. Праздникен ӟечкыласа пусйысал: кунлык басьтон калыклы сётэмын. Шумпотымон, асьме азьветлӥсьёсмы та луонлыкез кутыны быгатӥзы шуыса. Табере асьме республикамылэн нимыз, Россиын гинэ ӧвӧл, кунгож сьӧрын но тодмо.

Сяськаосын тырмиз кунлыкез кылдытон понна ужам азьветлӥсьлэн Кузебай Гердлэн памятникез но.

Таиз синпелет 15 ар ӵоже Ижысь Коммунаров ульчаын, национальной музей азьын сылэ. Ӵапак Кузебай Герд 100 ар талэсь азьло сюлмаськиз шаермылэсь историзэ утён борды басьтӥськыны.

Синпелет азьын вераськизы К.Герд нимо музейлэн директорез Александр Волков, Ижысь К.Герд нимо гимназиез кылдытӥсь Ольга Шилова, «Айкай» театрлэн кивалтӥсез Пётр Данилов.

Нациосын ужан политикая министр Лариса Буранова ӟечкылаз Удмуртилэсь дано гражданинзэ, «Удмурт кенеш» огазеяськонэн кема аръёс ӵоже кивалтэм Валентин Тубыловез.

— Гердлы памятник пуктонэ трос «кенешчиос» пыриськизы вал. Калыкез ӝуткам огъя уже, памятник пуктыны уксё люкамы. Та ужез калыкез вырӟытон понна кутскимы, Удмуртилэн Правительствоез но зол юрттӥськиз соку. Туннэ юаны луысал ке, мон Гердлы юан сётысал: шонер-а меда солэсь малпанзэ быдэстӥськом? Солэн, дыр, тросгес но бадӟымгес малпанъёсыз вал. Шумпотӥсько, туннэ асьмеос люкаськыны быгатӥм шуыса, — вераз Валентин Тубылов.

Ужрадэз йылпумъяса, К. Гердлэн памятникез доры люкаськемъёс ваньзы ӵош быдэстӥзы «Удмурт кенешлэсь» «Яратэ!» гимнзэ.