Форумын ужазы йӧскалык политикая министр Эдуард Петров, «Удмурт Кенеш» огазеяськонлэн правлениезлэн ёзчиосыз - «Удмурт дунне» газетлэн валтӥсь редакторез Елена Миннигараева, «Мынам Удмуртие» ТРК-ысь анай кылын передачаос понна кыл кутӥсь Сергей Касаткин но Ижысь 6-тӥ поликлиникалэн кивалтӥсез, врач аллерголог-иммунолог Надежда Гузнищева.

Улын Балтачын 3 но ӝыны даур ӵоже ини мыло-кыдо, ужась, азинлыко, кырӟаны-вераны быгатӥсь, спортын вормонъёс басьтӥсь удмуртъёс уло. Ачиз гурт ёрос центрзылэсь ог 25 километр кеме интыяськемын. Бадӟым люкетэз улӥсьёссы удмуртъёс ке но, вӧзазы ик ог-огзэс валаса уло бигеръёс, башкиръёс, кӧня ке ӟучъёс.

Гуртын улыны, азинскыны ваньмыз вань – нылпи сад, школа, культурая юрт, магазин, «Рассвет» СПК. Но сюлмаськонъёстэк уг луы. Вань курытсэ юыны яратӥсьёс но соин сэрен кылдӥсь шуг-секытъёс.

Ӵапак соин ик Улын Балтач поселениен кивалтӥсь удмурт воргорон, трос нылпио атай – Эдуард Рахимзянов - малпаз Башкортостанын орчись «Трезвое село» конкурсэ пыриськыны. Гуртсы ёросъя вормисе потӥз. Табере быдэс Башкортостанысь гуртъёс пӧлын нюръяське. Удмурт гуртлы вань мылкыдзэ сётыса, юрттыны тырше Татышлы ёрослэн йырыз Фанур Шайхисламов но, ёросысьтызы вань мыло-кыдоос, ӟучъёс, удмуртъёс, бигеръёс, башкиръёс.

Кыдёкысь удмурт гуртлы юрттыны мылкыд кариз «Удмурт Кенеш» огазеяськон но. Угось уно аръёс ӵоже со Башкортостанысь Татышлы ёросысь удмуртъёсын, татысь Национально-культурной центрен кусып возе. Та дыр ӵоже сомында огъя ужъёс, тунсыко проектъёс улонэ пыӵамын! Татысь удмуртъёслэн огазеяськонэнызы кивалтӥсь Людвиг Зидымаков Улын Балтач гуртысь школалэн директорез луэ. Татын кӧня ке аръёс ӵоже ни «Усточикар» лагерь радъяське.

Поселенилэн йырыз Эдуард Бурханович пусъе:
- Республикаямы «Территория трезвости» конкурсын ӧм ке но ворме, вань тыршеммы, лэсьтэм ужмы юнме уз луы шуыса оскисько. Та конкурсэ гуртоосты кыскыны нырысь туж секыт вал, кужмысь сямен но ужрадъёсы поттамы. Нош табере югдур воштӥськиз, ваньзылэн огъя мылкыдзы, конкурсэ пыриськон туж трос выль тодон-валан, мылкыд сётӥз. Калык вала ини, кудӟытӥсьсэ юытэк но улыны луэ, та куинь толэзь ӵоже сомында лэсьтэмын!

«Территория трезвости» форум но конкурсын асьсэды возьматон понна малпамын вал. Форуме пыриськизы гуртысь потэм дано кивалтӥсьёс, спортсменъёс, нимысьтыз ӧтем куноос - экспертъёс, врачъёс, наркологъёс, Удмуртиысь куноос, Башкортостанысь дышетонъя министерствоысь кивалтӥсьёс, Башкортостанысь фин-угор калыкъёслэн ассамблеяенызы кивалтӥсь В. Ялаев, башкиръёслэн курултайзылэн быдэсъясь комитетэзлэн кивалтӥсез Ю. Юсупов но трос мукетъёс.

Гуртоос но вань мылкыд карисьёс 7 пӧртэм (!) секциослэн ужазы пыриськизы. Форумен огвакыт мынӥз кырӟан-веранъя "Дуно марӟанъёс" фестиваль. Отчы Башкортостанысь гуртъёсысь пӧртэм коллективъёс пыриськизы, вуылӥз Удмуртиысь Вотка ёросысь коллектив но.

Ужрадъёс огвакытэ ик мынӥзы культурая юртын, школаын, музейын...