Люкаськем куноосты пумитаса, шуныт кылъёсын вазиськизы Вавож ёрослэн йырыз Олег Овчинников, "Удмурт Кенеш" огазеяськонлэн Тӧроез Татьяна Ишматова, йӧскалык политикая министр Эдуард Петров, Вавож ёросысь депутатъёслэн Кенешсылэн тӧроез Александр Шишкин, Удмурт йӧскалык театрлэн кивалтӥсез Андрей Ураськин, Вавож ёросысь ёзэтмылэн кивалтӥсез Ирина Ложкина.

Шудон улсын командаос тунсыко юанъёслы валэктонъёс утчазы. Ужрадэз радъясьёс - Вавож ёросысь "Удмурт Кенешлэн" ёзэтэз но Шаертодонъя музей - сюлмысь тыршиллям. Шудонэз дасян понна соослы трос гинэ литература бугыръяно, пе, луэм.

"Озьы ми тодӥм, кытын уло калмез выжыос, - шуо вавожъёс. - Со Киров улосвылысь куд-ог ёросъёс, Сьӧлта, Сюмси, Ува но Вавож ёросъёс, озьы ик Красногорск, Эгра, Бӧдья, Можга но Кизнер ёросъёсысь куд-ог гуртъёс. Тодосчиослэн верамъёссы пӧртэмесь. Соин ик шуг вераны, мукет ёросъёс сярысь. Но Михаил Атамановлэн верамезъя, чылкак калмез луо Пичи Пурга ёросын вӧлмем Можга, Докъя воршудъёс, нош Бигра – ньыль агай-вынъёс пӧлысь (Бурсин, Сьӧлта, Можга но Бигра) огез калмез батыр. Вераськемзыя но та воршудъёсысь пурга калык матын луэ калмезъёслы. Соин ми калмезъёс пӧлы чортӥм баграш-биграосты но".

Визьзэс сынан вискын командаослы шулдыр мылкыд кузьмазы ёросъёсысь артистъёс. Шудонзы калмезъёслэн зэмос праздниклы пӧрмиз. Озьы ке но, татын вал вормисьёс. Лэчыт визенызы висъяськизы Вавож школаысь дышетӥсьёслэн "Тур-пар" командазы но "Бӧляк" калык ансамбльлэн командаез. Кыкетӥ интыез люкизы "Вушапык" (Ува) но "Ӟозлуд нылъёс" (Вавож) командаос. Нош куинетӥ интыез басьтӥзы "Узы-боры нылашъёс" (Сюмси), "Токмолёкъёс" (Пазял Можга ёрос) но "Гудыри" (Вавожысь "Удмурт Кенеш" ветеранъёс) командаос.

Люкаськемъёс пусйизы, таче ужрадъёс бере уката но золгес гажаны кутскиськод анай кылмес но удмурт йылолъёсмес шуыса.