Назад к Новостям
20.04.22
"Удмурт Кенеш" огазеяськонлэн Тӧроез Татьяна Ишматова туннэ Сюмсиын ужаз. Нырысь ик со "Точка роста" центразы вуылӥз. Отын школаысь но "Берёзка" нылпи садысь пиналъёс пластилинлэсь удмурт кылын мультфильмъёс лэсьто. Вуэм куноослы соос пӧрмытэм ужзэс возьматӥзы.
Котырес ӝок сьӧрын кенешон ортчиз Сюмсиын
Ужрад азьланьтӥськиз ёрос лулчеберетъя юртын. Отын ортчиз "Анай кыл сярысь сюлмаськыса" нимо котырес ӝок сьӧрын кенешон. Со удмурт кылэн герӟаськем ужпумъёслы сӥземын вал. Ужрадэз радъяз огазеяськонмылэн Сюмси ёросысь ёзэтэз.

Котырес ӝӧк сьӧрын Татьяна Ишматова удмурт кылэз семьяын, нылпи садын но школаын дышетон сярысь вераськиз. Нош Удмурт Элькунысь дышетон удысын йӧскалык ужпумъёсты тодон-эскеронъя институтлэн кивалтӥсез Надежда Ураськина валэктонъёс сётӥз удмурт кылэз дышетон катъёс пумысен. Ужрад улсын вераськизы Сюмси ёросысь ёзэтмылэн кивалтӥсез Наталья Стрелкова, озьы ик мукет кенешчиосмы. Соос нылпиосты удмурт кыллы дышетон удысын кылдэм шуг-секытъёссэс шараязы.

Ужрадэ пыриськиз Сюмси ёрослэн йырыз Владимир Семёнов но. Со пусйиз, ёросазы йӧскалык сямъёсты но йылолъёсты утён но азинтон понна бадӟым уж нуиське, удмурт кылэз но азьпалан дышетыны трос луонлыкъёс кылдытэмын шуыса.

Ужрадлэн пумаз люкаськемъёс азьын самодеятельной коллективъёс пичильтык концерт возьматӥзы, лулчеберет юртысь ӧнерчиос «Узы-Боры» фестивальзы сярысь мадизы.


Вступайте в наши группы в соцсетях

Присоединяйтесь